«ការកសាងគ្រឹះនៃការទុកចិត្តគ្នា» នៅតែជាអ្វីដែលកម្ពុជា-អាមេរិកត្រូវការដើម្បីជំរុញទំនាក់ទំនង

ស្ថានទូតអាមេរិកបានបង្ហោះនូវសារមួយនៅព្រឹកថ្ងៃសុក្រនេះមួយថ្ងៃបន្ទាប់ពីប្រតិភូ​ទូតបាន​ជួបពិសារអាហារពេលព្រឹកមួយជាមួយអនុប្រធានទី១ ព្រឹទ្ធសភា លោក អ៊ុច បូរិទ្ធ ដោយបានលើកឡើងថា តម្រូវការនៃការ «កសាងគ្រឹះនៃការទុកចិត្តគ្នា» គឺជាអ្វីដែលភាគីទាំងពីរបានពិភាក្សាអំពីទំនាក់ទំនងទ្វេភាគីក្នុងរយៈពេល៧៥ឆ្នាំមកនេះ។

គណៈប្រតិភូអាមេរិកដឹកនាំដោយលោកស្រីភារធារី Bridgette Walker បានជួបជាមួយអនុប្រធានទី១ នៃព្រឹទ្ធសភា លោក អ៊ុច បូរិទ្ធ ពិសារអាហារពេលព្រឹកនៅថ្ងៃទី៣០ ខែមករា ឆ្នាំ២០២៥ ក៏ដូចជាដើម្បីពិភាក្សាអំពីទំនាក់ទំនងទ្វេភាគី ក្នុងឆ្នាំដែលប្រទេសទាំងពីរអបអរខួបលើកទី ៧៥ នៃទំនាក់ទំនងការទូតផងដែរ។

តាមរយៈការបង្ហោះលើហ្វេសបុកផេកស្ថានទូតអាមេរិកប្រចាំកម្ពុជាបានឱ្យដឹងថា៖ «គណៈប្រតិភូទាំងសងខាង បានថ្លែងសង្កត់ធ្ងន់លើតម្រូវការកសាងគ្រឹះនៃការទុកចិត្តគ្នា ដើម្បីសម្រេចបានវិបុលភាព សុវត្ថិភាព និងសន្តិសុខ ដើម្បីជាប្រយោជន៍នៃប្រទេសទាំងពីរ»។

ទំនាក់ទំនងការទូតរវាងកម្ពុជា-អាមេរិក បានបង្កើតឡើងក្នុងឆ្នាំ១៩៥០ ដោយលោក Donald R. Heath គឺជាឯកអគ្គរដ្ឋទូតអាមេរិកដំបូងនៅកម្ពុជា ដោយបានថ្វាយសារតាំងជូនព្រះករុណាសម្ដេចព្រះបាទ នរោត្តមសីហនុ នៅថ្ងៃទី១១ ខែកក្កដា ឆ្នាំ១៩៥០។

អគ្គលេខាធិការរាជបណ្ឌិតសភាកម្ពុជា លោកបណ្ឌិត យង់ ពៅ យល់ថាការមិនទុកចិត្តគ្នារវាងកម្ពុជា-អាមេរិក អាចបណ្ដាលមកពីកត្តាប្រវត្តិសាស្ត្រ។ ហើយដើម្បីកសាងនូវទំនុកចិត្តគ្នាលោកបណ្ឌិត យង់ ពៅ យល់ថាប្រទេសទាំងពីរត្រូវបង្កើនប្រយោជន៍ឱ្យគ្នា ផ្លាស់ប្ដូរទស្សនកិច្ចរវាងមន្ត្រីកម្ពុជានិងអាមេរិក ព្រមទាំងបើកចំហរស្ដាប់គ្នាទៅវិញទៅមក។

លោកថា៖ «យើងកសាងទំនុកចិត្តគ្នាបានគឺត្រូវស្វែងយល់ពីគ្នាទាំងទិដ្ឋភាពច្បាប់ ទិដ្ឋភាពនយោបាយ ទិដ្ឋភាពសង្គមវិទ្យានយោបាយ និងទិដ្ឋភាពនៃការប្រជែងឥទ្ធិពលនៅក្នុងលំហភូមិសាស្ត្រ»។

ក្នុងពិធីអបអរខួប៧៥ឆ្នាំនៃទំនាក់ទំនងការទូតកាលពីថ្ងៃទី២៤ ខែមករា ឧបនាយករដ្ឋមន្ត្រីការបរទេសកម្ពុជាលោក ប្រាក់ សុខុន បាន​លើកឡើងពីការពេញចិត្តចំពោះទំនាក់ទំនងមិត្តភាពជាមួយសហរដ្ឋអាមេរិក ដោយបានបញ្ជាក់ពីការ​ប្ដេជ្ញាចិត្តរបស់កម្ពុជាក្នុងការពង្រឹងចំណងមិត្តភាពជាដើម្បីផលប្រយោជន៍ទៅវិញទៅមកនៃប្រទេសទាំងពីរផងដែរ។

ទំនាក់ទំនងកម្ពុជា-អាមេរិក ក្នុងប្រវត្តិសាស្ត្រត្រូវបានគេមើលឃើញថាល្អផងនិងអាក្រក់ផងតែនៅតែអាចរក្សាបាននូវទំនាក់ទំនងរហូតដល់ពេលបច្ចុប្បន្ន ដោយសារភាពរកាំរកូសកន្លងទៅកម្ពុជាក៏ធ្លាប់បាន​ជួលក្រុមហ៊ុនបញ្ជុះបញ្ជូលអាមេរិកដើម្បីជួយដល់ការស្វែងយល់ពីគ្នារវាងអាមេរិកនិងកម្ពុជាផងដែរ។  ថ្មីៗនេះទំនាក់ទំនងត្រូវបានឃើញសញ្ញាវិជ្ជមានជាច្រើន បន្ទាប់ពី​មានការចូលចតឡើងវិញនៃនាវាចម្បាំងអាមេរិក USS SAVANNAH ក្រោយខកខាន៨ឆ្នាំមក ហើយសកម្មភាពរួមគ្នារវាងប្រទេសទាំងពីរជាច្រើនក៏គ្រោងបានបង្កើតឡើងវិញផងដែរ៕

អត្ថបទដោយ ហ៊ុន សិរីវឌ្ឍន៍