សន្តិសុខសង្គម

ឃាត់ខ្លួនជនសង្ស័យ ០៦ នាក់ កាប់ប្លន់ម៉ូតូក្នុងភូមិសាស្ត្ររាជធានីភ្នំពេញ

បានផុស

៦ ខែ មុន

នៅ

ថ្ងៃអាទិត្យ ១៩ តុលា ២០២៥

ដោយ

ក្រុមជនសង្ស័យចំនួន ០៦ នាក់ ត្រូវបានកម្លាំងសមត្ថកិច្ចព្រហ្មទណ្ឌកម្រិតស្រាលរាជធានីភ្នំពេញ ធ្វើការស្រាវជ្រាវឃាត់ខ្លួន បន្ទាប់ពីធ្វើសកម្មភាពកាប់ប្លន់យកម៉ូតូក្នុងភូមិសាស្ត្ររាជធានីភ្នំពេញយ៉ាងសកម្ម។

ប្រតិបត្តិការនេះកម្លាំងសមត្ថកិច្ចព្រហ្មទណ្ឌទទួលបានដំណឹងកាលពីថ្ងៃទី ១៧ ខែតុលា ឆ្នាំ ២០២៥ មានក្រុមជនសង្ស័យមួយក្រុមបានធ្វើសកម្មភាពយ៉ាងសកម្មប្លន់យកម៉ូតូក្នុងភូមិសាស្ត្ររាជធានីភ្នំពេញ សមត្ថកិច្ចជំនាញបានបន្តធ្វើការស្រាវជ្រាវឃាត់ខ្លួនជាបន្តបន្ទាប់រហូតដល់ថ្ងៃទី ១៨ ខែតុលា ឆ្នាំ ២០២៥។

លោកវរសេនីយ៍ឯក ម៉ម សាវន ប្រធានការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ករណីទី០១-កាលពីវេលាម៉ោងប្រហែល ០៤ និង ៤០ នាទី ថ្ងៃទី ១៧ ខែតុលា ឆ្នាំ ២០២៥ មានក្រុមជនសង្ស័យធ្វើសកម្មភាពកាប់ប្លន់យកម៉ូតូម៉ាក ហុងដាសេ ១២៥ ពណ៌ខ្មៅ ស៊េរីឆ្នាំ ២០២៥ ពាក់ផ្លាកលេខ ភ្នំពេញ ១LQ-៥៧២១ មិនបានសម្រេច បណ្ដាលឲ្យជនរងគ្រោះរងរបួសធ្ងន់ធ្ងរ ចាក់ចំក្បាលពោះ ត្រគាកខាងឆ្វេង និងដៃខាងឆ្វេង នៅត្រង់ចំណុចមហាវិថីឈ្នះឈ្នះ ក្រុម ១៤ ភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។

ករណីទី០២-អំពើលួចមានស្ថានទម្ងន់ទោស ដោយសារការប្រព្រឹត្តអំពើហិង្សា (ធាក់ និងកាប់ប្លន់យកម៉ូតូម៉ាក ហុងដាសេ ១២៥ ពណ៌ខ្មៅ ស៊េរីឆ្នាំ ២០២៥ ពាក់ផ្លាកលេខ ភ្នំពេញ ១LM-៤៧១១ កើតហេតុនៅចំណុចមុខស្ថានប្រេងឥន្ធនៈកាល់តិច ផ្លូវបេតុង ៣០ ម៉ែត្រ ស្ថិតក្នុងភូមិព្រៃធំ សង្កាត់ព្រៃ.ស ខណ្ឌដង្កោ រាជធានីភ្នំពេញ កាលពីវេលាម៉ោង ០២ និង ៣០ នាទី ថ្ងៃទី ១៥ ខែតុលា ឆ្នាំ ២០២៥ ដែលជនរងគ្រោះមានឈ្មោះ ហ៊ីន ហួន ភេទប្រុស អាយុ ២៣ ឆ្នាំ ជនជាតិខ្មែរ។

ក្នុងរង្វង់ប្រតិបត្តិការនេះសមត្ថកិច្ចជំនាញបានធ្វើការស្រាវជ្រាវឃាត់ខ្លួនបានជនសង្ស័យចំនួន ០៦ នាក់ រួមមាន ៖ ០១-ឈ្មោះ ភឿង វុធឌី ភេទប្រុស អាយុ ២៣ ឆ្នាំ ជនជាតិខ្មែរ , ០២-ឈ្មោះ ធី សុថា ហៅ ញ៉ាញ់ ភេទប្រុស អាយុ ១៨ ឆ្នាំ , ០៣-ឈ្មោះ អ៊ុច សូលីម៉ាទូស៊ីង្ស ភេទប្រុស អាយុ ២០ ឆ្នាំ , ០៤-ឈ្មោះ សរ ដេវីត ហៅ សេម ភេទប្រុស អាយុ ១៨ ឆ្នាំ , ០៥-ឈ្មោះ ស្រ៊ី គីមសៀ ភេទប្រុស អាយុ ១៧ ឆ្នាំ , ០៦-ឈ្មោះ នឿន វាសនា ភេទប្រុស អាយុ ២០ ឆ្នាំ។

បច្ចុប្បន្ន ជនសង្ស័យទាំង ០៦ នាក់ រួមទាំងវត្ថុតាង ត្រូវបានកម្លាំងសមត្ថកិច្ចព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ យកទៅសួរនាំ ដើម្បីអនុវត្តតាមនីតិវិធីច្បាប់៕

អត្ថបទ ៖ ម៉េង