ពន្ធនាគារខេត្តក្រចេះ ច្រានចោល​ការ​ចោទប្រកាន់​​បង្ខំ​អ្នកទោសឆបោកតាមអនឡាញ

ពន្ធនាគារខេត្តក្រចេះបានចេញសេចក្ដីបំភ្លឺច្រានចោល ការចោទប្រកាន់​បានបង្ខំ​អ្នកទោសធ្វើការឆបោកតាម​អនឡាញ​។

ក្នុងសេចក្ដីបំភ្លឺអង្គភាពពន្ធនាគារខេត្តក្រចេះ បានបដិសេធក្រោយ​ផេកហ្វេសប៊ុក «សម្លេងមនសិការខ្មែរ» បានធ្វើការចុះផ្សាយនូវខ្លឹមសារក្នុងន័យចោទប្រកាន់និងបំផ្លើសការពិត ដែល​ធ្វើឱ្យប៉ះពាល់ដល់កិត្តិយស សេចក្តីថ្លៃថ្នូររបស់អង្គភាពពន្ធនាគារខេត្តក្រចេះ ក៏ដូចជាអគ្គនាយកដ្ឋានពន្ធនាគារក្រសួងមហាផ្ទៃ។

តាមរយៈ​សេចក្ដីបំភ្លឺចុះ​​ថ្ងៃទី ២៣ ខែតុលា ឆ្នាំ២០២៥ ពន្ធនាគារខេត្តក្រចេះបានបញ្ជាក់ថា នៅក្នុងពន្ធនាគារមិនត្រូវបានអនុញ្ញាត​ឱ្យជនជាប់ឃុំប្រើប្រាស់ទូរសព្ទចល័តនោះទេ ហេតុដូច្នេះគ្មានហេតុផលណាមួយដែលជនជាប់ឃុំអាចធ្វើការឆបោកតាមអនឡាញបានឡើយ។

រាល់ការផ្ញើសម្ភារប្រើប្រាស់ ឱសថ គ្រឿងបរិភោគ ឱ្យជនជាប់ឃុំ អង្គភាពពន្ធនាគារបានធ្វើការឆែកឆេរយ៉ាង​ល្អិតល្អន់បំផុត។ បន្ថែមលើនេះ អង្គភាពក៏បានធ្វើការឆែកឆេររុករកវត្ថុហាមឃាត់ក្នុងបន្ទប់ឃុំឃាំងជាប្រចាំក្នុង​១ សប្តាហ៍ ចំនួន ២ ទៅ ៣ ដង ពុំបានរកឃើញអ្វីដែលខុសពីបទបញ្ជាផ្ទៃក្នុងពន្ធនាគារ និងច្បាប់ពន្ធនាគារនោះទេ។ មិនតែប៉ុណ្ណោះអង្គភាពពន្ធនាគារ តែងតែធ្វើការអប់រំណែនាំដល់ជនជាប់ឃុំឱ្យមានការភ្ញាក់រលឹកនូវទោសកំហុសរបស់ខ្លួនដែលបានប្រព្រឹត្ត ហើយខិតខំកែប្រែខ្លួនឱ្យក្លាយទៅជាពលរដ្ឋល្អ និងអាចសមាហរណកម្មទៅក្នុងសង្គមវិញក្រោយពីអនុវត្តទោសចប់៕

បើយោងតាមការចុះផ្សាយ​បាន​លើកឡើងថា សកម្មភាព​ឆបោកគឺ​មាន​ការ​បង្កើតក្រុម​ចំនួន ១០ ក្រុម ដោយ​ក្នុងមួយក្រុមមានគ្នា ៣០ នាក់ ដែល​សកម្មភាពនេះ​បានធ្វើ​​រយៈពេលប្រមាណ ៥ ខែរួចមកហើយ៕

អត្ថបទ៖ ប្រុញ វិធិន