សន្តិសុខសង្គម

នគរបាលដង្កោ ស្រាវជ្រាវ ៦ ម៉ោង តាមចាប់ជនសង្ស័យ ៤ នាក់ ក្រោយលួចរថយន្តពលរដ្ឋទុកនៅខាងមុខផ្ទះ

បានផុស

៦ ខែ មុន

នៅ

ថ្ងៃអង្គារ ៦ មករា ២០២៦

ដោយ

អ៊ិន ពិសី

នគរបាលខណ្ឌដង្កោ បង្ក្រាបជនសង្ស័យ ៤ នាក់ ពាក់ព័ន្ធករណីលួចរថយន្ត ១ គ្រឿង របស់ប្រជាពលរដ្ឋដែលទុកនៅខាងមុខផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការឃាត់ខ្លួននេះបានធ្វើឡើងកាលពីព្រឹកថ្ងៃទី ៥ ខែមករា ឆ្នាំ ២០២៦ ដោយកម្លាំងអធិការដ្ឋាននគរបាលខណ្ឌដង្កោ សហការជាមួយ ស្នងការដ្ឋាននគរបាលខេត្តកំពត។

សមត្ថកិច្ចបានឲ្យដឹងថា កម្លាំងនគរបាលព្រហ្មទណ្ឌខណ្ឌដង្កោ បានចុះធ្វើការស្រាវជ្រាវឃើញសកម្មភាពជនសង្ស័យលួចរថយន្តរបស់ជនរងគ្រោះនៅវេលាម៉ោង ២ និង ២៥ នាទីយប់រំលងអធ្រាត្រឈានចូលថ្ងៃទី ៥ ខែមករា ឆ្នាំ ២០២៦។ ក្នុងនោះដែរ សមត្ថកិច្ច ក៏បានចុះសហការជាមួយស្នងការដ្ឋាននគរបាលខេត្តកំពត ធ្វើការឃាត់ខ្លួនជនសង្ស័យបានចំនួន ៤ នាក់ រួមមាន ៖ ឈ្មោះ ឈឹម បូរ៉ា ភេទប្រុស អាយុ ៣៧ ឆ្នាំ ជនជាតិខ្មែរ , ឈ្មោះ លី រ៉ាវី ភេទប្រុស អាយុ ២៨ ឆ្នាំ ជនជាតិខ្មែរ ស្នាក់នៅសង្កាត់ច្រាំងចំរេះទី ១ ខណ្ឌឫស្សីកែវ រាជធានីភ្នំពេញ , ឈ្មោះ ពៅ ពេជ្រ ភេទប្រុស អាយុ ២៧ ឆ្នាំ ជនជាតិខ្មែរ ស្នាក់នៅភូមិទ្រា ១ សង្កាត់ស្ទឹងមានជ័យ ១ ខណ្ឌមានជ័យ រាជធានីភ្នំពេញ , ឈ្មោះ ប្រាក់ អុល ភេទប្រុស អាយុ ២៣ ឆ្នាំ ជនជាតិខ្មែរ ស្នាក់នៅភូមិទ្រា ១ សង្កាត់ស្ទឹងមានជ័យ ១ ខណ្ឌមានជ័យ រាជធានីភ្នំពេញ។ ដោយឡែក វត្ថុតាងដកហូតបានរួមមាន ៖ រថយន្ត ១ គ្រឿង ម៉ាក Prius ពណ៌ខៀវ ស៊េរីឆ្នាំ ២០០៦ ពាក់ស្លាកលេខ ភ្នំពេញ 2BK-0148។

បច្ចុប្បន្ន ជនសង្ស័យទាំង ៤ នាក់ ព្រមទាំងវត្ថុតាង ត្រូវបានឃាត់ខ្លួន និងរក្សាទុក ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី។

គួរបញ្ជាក់ថា កាលពីវេលាម៉ោង ៩ និង ៣០ នាទីយប់ ថ្ងៃទី ៤ ខែមករា ឆ្នាំ ២០២៦ ជនរងគ្រោះបានទុករថយន្ត ១ គ្រឿង ម៉ាក Prius នៅមុខផ្ទះលេខ ៣៥B ផ្លូវលេខ ២B ក្នុងបុរី លឹម ឈាងហាក់ ស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ដោយបានចាក់សោទ្វាររថយន្តត្រឹមត្រូវ រួចក៏បានចូលសម្រាកក្នុងផ្ទះ។ លុះរហូតដល់វេលាម៉ោង ៤ និង ១៥ នាទីទៀបភ្លឺ ឈានចូលថ្ងៃទី ៥ ខែមករា ឆ្នាំ ២០២៦ ជនរងគ្រោះបានក្រោកពីដេកចេញទៅមើល ស្រាប់តែបាត់រថយន្តពីកន្លែងទុក។ ពេលនោះ ជនរងគ្រោះក៏បានរាយការណ៍ប្រាប់សមត្ថកិច្ចប៉ុស្តិ៍នគរបាលរដ្ឋបាលដង្កោឲ្យជួយអន្តរាគមន៍តែម្ដង៕

អត្ថបទ ៖ រដ្ឋា