ឃាត់ខ្លួនមនុស្ស៧នាក់ ករណីលួចតភ្ឋាប់បំបែកខ្សែ កាបអុបទិច Wi-Fiមិត្តហ្វូន

កងរាជអាវុធហត្ថស្រុកគិរីសាគរ បានឃាត់ខ្លួនមនុស្ស៧នាក់ បន្ទាប់ពីធ្វើសកម្មភាពលួចតភ្ឋាប់បំបែកខ្សែកាបអុបទិច Wi-Fiមិត្តហ្វូន។

លោកឧត្តមសេនីយ៍ត្រី តាំង ឈុនស្រេង មេបញ្ជាការកងរាជអាវុធហត្ថខេត្តកោះកុង បានឲ្យដឹងរសៀលថ្ងៃទី២៧ ខែមករា ឆ្នាំ២០២៦ថា តបតាមពាក្យបណ្ដឹង របស់ឈ្មោះDAO DONG PHONG  ភេទប្រុសអាយុ ៤៧ ឆ្នាំ ជនជាតិវៀតណាម តំណាងក្រុមហ៊ុមិត្តហ្វូនប្រចាំខេត្តកោះកុង បច្ចុប្បន្នស្នាក់នៅភូមិ២ សង្កាត់ស្មាច់មានជ័យក្រុងខេមរភូមិន្ទ ខេត្តកោះកុង។

មេបញ្ជាការកងរាជអាវុធហត្ថខេត្ត បានបន្តថា ដោយមានការណែនាំតំណាងអយ្យការសាលាដំបូងខេត្ត មេបញ្ជាការរង និងកម្លាំងកងរាជអាវុធហត្ថស្នាក់ការសន្តិសុខតារាសាគរ ព្រមទាំងកម្លាំងមូលដ្ឋានកងរាជអាវុធហត្ថស្រុកគិរីសាគរបង្ក្រាប និងឃាត់ខ្លួនជនសង្ស័យចំនួន៧នាក់កាលពីយប់ថ្ងៃទី២៦ ខែមករា ឆ្នាំ ២០២៦ វេលាម៉ោង ២២ និង ១៥ នាទីនៅចំណុចភូមិពាមកាយ  ឃុំកោះស្ដេច  ស្រុកគីរីសាគរ  ករណីរំលោភលើកម្មសិទ្ធិបញ្ញា(លួចតភ្ឋាប់បំបែកខ្សែកាបអុបទិច Wi-Fiមិត្តហ្វូន។

វត្ថុតាងរួមមានរថយន្តចំនួន ០២គ្រឿង ម៉ាកស្ការិច ពណ៌ទឹកប្រាក់ ចំនួន ០១គ្រឿង ពាក់ផ្លាកលេខភ្នំពេញ 2BE-0569 និង រថយន្តម៉ាក WULING  ពណ៌ទឹកប្រាក់ចំនួន ១ គ្រឿងពាក់ផ្លាកលេខ  ភ្នំពេញ 2CC-0361 និង  សម្ភារៈមួយចំនួនទៀត។ បច្ចុប្បន្នកម្លាំងការិយាល័យជំនាញ នៃមន្ទីរស្រាវជ្រាវបង្ក្រាបបទល្មើស កងរាជអាវុធហត្ថខេត្តកោះកុង កំពុងកសាងសំណុំរឿងតាមនីតិវិធី៕ អត្តបទ:សិរីវឌ្ឍន: