អាជ្ញាធរសង្កាត់ស្ទឹងមានជ័យទី២ ទុកពេល៧ថ្ងៃឲ្យអាជីវករលក់ដូរនៅមុខសាលាបឋមសិក្សាស្ទឹងមានជ័យរុះរើតូបចេញ

រដ្ឋបាលសង្កាត់ស្ទឹងមានជ័យទី២ ខណ្ឌមានជ័យ បានទុករយះពេលមួយសប្ដាហ៍ឲ្យប្រជាពលរដ្ឋទាំងអស់ ជាពិសេសអាជីវករលក់ដូរនៅខាងមុខបរិវេនសាលាបឋមសិក្សាស្ទឹងមានជ័យ តាមបណ្ដោយផ្លូវ២១៧ ដែលរំលោភលើដីចំណីផ្លូវសាធារណៈត្រូវរុះរើសំណង់ តូប ស្លាកប៉ាណូ សម្ភារៈ និងទំនិញផ្សេងៗ ចេញដោយខ្លួនឯងលើដីចំណីផ្លូវសាធារណៈ ដោយទុករយ:ពេល០៧ថ្ងៃ ចាប់ពីថ្ងៃជូនដំណឹងនេះតទៅ។ នេះបើយោងតាមសេចក្ដីជូនដំណឹងរបស់រដ្ឋបាលសង្កាត់ស្ទឹងមានជ័យទី២ កាលពីថ្ងៃទី០២ ខែកុម្ភៈ ឆ្នាំ២០២៦នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្ដីជូនដំណឹង រដ្ឋបាលសង្កាត់ស្ទឹងមានជ័យទី២ បានណែនាំប្រជាពលរដ្ឋ ក៏ដូចជាអាជីវករទាំងអស់ដែលត្រូវបញ្ឈប់ការលក់ដូររំលោភដីចំណីផ្លូវសាធារណៈ ពិសេសម្ចាស់ទីតាំង,ម្ចាស់តូបមិនត្រូវដាក់តាំងរបស់របរលក់ដូរធ្វើប៉ះពាល់ផ្លូវសាធារណៈឡើយ។ ការណែនាំនេះ ធ្វើឡើងដើម្បីលុបបំបាត់ការលក់ដូររំលោភលើដីចំណីផ្លូវសាធារណៈ និងចូលរួមអនុវត្តរក្សាបាននូវសោភ័ណ្ឌភាព សណ្តាប់ធ្នាប់សាធារណៈរបស់ទីក្រុងស្អាត អោយមានសោភ័ណភាពល្អ និងបង្ការបញ្ហាគ្រោះថ្នាក់ចរាចរណ៍ជាយថាហេតុ។ ក្នុងករណីមិនព្រមអនុវត្ត រដ្ឋបាលសង្កាត់ស្ទឹងមានជ័យទី២ នឹងចុះចាត់វិធានការរុះរើចេញឱ្យអស់ ដោយពុំទទួលខុសត្រូវរាល់ការខូចខាតបាត់បង់សម្ភារៈ ដែលមាននៅលើទីតាំងខាងលើនេះឡើយ។

គួរបញ្ជាក់ថា លោក ឃួង ស្រេង អភិបាលរាជធានីភ្នំពេញបានណែនាំឱ្យអាជ្ញាធរមូលដ្ឋានខណ្ឌទាំង១៤ និងសង្កាត់ទាំង១០៥ ត្រូវយកចិត្តទុកដាក់រក្សាឱ្យបាននូវសន្តិសុខ សណ្តាប់ធ្នាប់ និងអនាម័យ បរិស្ថានល្អ៕

អត្ថបទ៖ សុភា