អាជ្ញាធរឃាត់ម៉ូតូ ៧គ្រឿង ដែលចតល្មើសច្បាប់នាំឲ្យស្ទះចរាចរណ៍ នៅជុំវិញរបងមន្ទីរពេទ្យកុមារជាតិ

អាជ្ញាធរខណ្ឌទួលគោក បានចុះរៀបចំសណ្តាប់ធ្នាប់ ជុំវិញរបងមន្ទីរពេទ្យកុមារជាតិ ដោយបានឃាត់ម៉ូតូ ៧គ្រឿង ដែលចតល្មើសច្បាប់ បង្កការកកស្ទះចរាចរណ៍ និងធ្វើឲ្យបាត់បង់សណ្តាប់ធ្នាប់។

ការចុះរៀបចំសណ្ដាប់ធ្នាប់នេះ ធ្វើឡើងនៅព្រឹកថ្ងៃទី ១៨ ខែមករា ឆ្នាំ ២០២២នេះ នៅតាមផ្លូវលេខ១១០ ផ្លូវ ២៥៧ ជុំវិញរបងមន្ទីរពេទ្យកុមារជាតិ ក្នុងសង្កាត់ទឹកល្អក់ទី១  ខណ្ឌទួលគោក រាជធានីភ្នំពេញ ដឹកនាំដោយលោក ទៀវ សំអឿន អភិបាលរង ខណ្ឌទួលគោក។

នៅក្នុងការចុះនេះ អាជ្ញាធរខណ្ឌទួលគោក បានឃាត់ម៉ូតូ ៧គ្រឿង ដែលចតល្មើសរំខាន នាំឲ្យកកស្ទះចរាចរណ៍ និងបាត់បង់សណ្តាប់ធ្នាប់ យកមករក្សាទុកនៅអធិកាដ្ឋាន នគរបាលខ​ណ្ឌទួលគោកជាបណ្តោះអាសន្ន ដើម្បីអប់រំ និងផាកពិន័យ តាមច្បាប់ចរាចរណ៍ផ្លូវគោក។

ចំណែកឯម្ចាស់ទីតាំងលក់ដូរ លើចិញ្ចើមផ្លូវលេខ ២៥៧ ចំនួន ៨ទីតាំង ត្រូវបានអាជ្ញាធរណែនាំ ឲ្យបញ្ឈប់ការលក់ដូរលើទ្រូងផ្លូវ ដែលនាំឲ្យបាត់បង់សណ្តាប់ធ្នាប់ និងកកស្ទះចរាចរណ៍ ផងដែរ៕