Update៖ ករណីធាក់ប្លន់យកម៉ូតូប៉ះចំមន្ត្រីយោធាមានកាំភ្លើងបាញ់៩គ្រាប់ស្លាប់ជនសង្ស័យម្នាក់

ជនសង្ស័យម្នាក់ ក្នុងចំណោមបក្ខពួកជាច្រើននាក់ត្រូវបានមន្ត្រីយោធាម្នាក់ ( ជនរងគ្រោះ ) បាញ់ជាច្រើនគ្រាប់បណ្តាលអោយស្លាប់ម្នាក់ និងបក្ខពួកជាច្រើននាក់ទៀតបានរត់គេចខ្លួនអស់ បន្ទាប់ពីក្រុមជនសង្ស័យខាងលើធ្វើសកម្មភាពធាក់ផ្តួលម៉ូតូជនរងគ្រោះអោយដួល រួច​លើកម៉ូតូជនរងគ្រោះបម្រុងបើករត់គេចខ្លួន ។

ហេតុការណ៍នេះបានកើតឡើងកាលពីវេលាម៉ោង០៥ព្រឹក ថ្ងៃទី២៤ ខែមីនា ឆ្នាំ២០២២ នៅតាមបណ្តោយផ្លូវ៥០ម៉ែត្រ ក្នុងសង្កាត់ព្រៃស ខណ្ឌដង្កោ រាជធានីភ្នំពេញ ។

តាមប្រភពអោយដឹងថា នៅមុនកើតហេតុជនរងគ្រោះបានជិះម៉ូតូមួយគ្រឿងហុងដាឌ្រីមសង់សេ១២៥ ស៊េរីឆ្នាំ២០២២ ពណ៌ខ្មៅ ពាក់ស្លាកលេខ ភ្នំពេញ 1JC-4840 ធ្វើដំណើរតាមបណ្តោយផ្លូវ៥០ម៉ែត្រ បំណងទៅអង្គភាពបំពេញការងារ ។ លុះដល់ចំណុចកើតហេតុ ក៏ស្រាប់តែលិចមុខជនសង្ស័យមួយក្រុមមានគ្នាចន្លោះពី៦ទៅ៧នាក់ ជិះម៉ូតូជាច្រើនគ្រឿងបានធ្វើសកម្មភាពជិះម៉ូតូទៅក្បែរជនរងគ្រោះ រួចធាក់ផ្ដួលម៉ូតូជនរងគ្រោះបណ្តាលអោយជនរងគ្រោះធ្លាក់ពីម៉ូតូដួលលើដី ។ ភ្លាមៗនោះ ជនសង្ស័យម្នាក់បានស្ទុះទៅលើកម៉ូតូ​ជនរង​គ្រោះបំណងជិះរត់គេច ក៏ត្រូវជនរងគ្រោះជាមន្ត្រីយោធាបានដកកាំភ្លើងពីចង្កេះបាញ់ស្រោចទៅលើក្រុមជនសង្ស័យបណ្តាលអោយជន​សង្ស័យម្នាក់ដែលជិះម៉ូតូរបស់ជនរងគ្រោះដួលស្លាប់នៅលើម៉ូតូតែម្តង ចំណែកដែលបក្ខពួកផ្សេងទៀតបានជិះរត់គេចបាត់ស្រមោលសូន្យ បន្ទាប់ពីដឹងថា ជនរងគ្រោះមានកាំភ្លើង។

ក្រោយកើតហេតុ កម្លាំងសមត្ថកិច្ចមូលដ្ឋានបានចុះដល់ទីតាំងកើហេតុដើម្បីធ្វើការពិនិត្យវិច្ច័យ ។ ក្នុងការពិនិត្យសមត្ថកិច្ចរកឃើញ​មានគ្រាប់កាំទុះចំនួន០៩គ្រាប់ ដែលជាគ្រាប់កាំភ្លើងម៉ាកឡុក ។

យ៉ាងណាមិញ សពជនសង្ស័យត្រូវបានដឹកតាមរថយន្តយកទៅកាន់ វត្តឬស្សីសាញ់ ដើម្បីធ្វើកោសល្យវិច័យនៅទីនោះ ។ ដោយឡែក ជនរងគ្រោះ ត្រូវបានសមត្ថកិច្ចអញ្ចើញខ្លួនទៅសាកសួរនាំ នៅអធិការដ្ឋាននគរបាលខណ្ឌ អំពីដំណើររឿងហេតុដែលបានកើតឡើង ។

សូមបញ្ជាក់ថា ចំពោះអត្តសញ្ញាណរបស់ជនរងគ្រោះ និងជនសង្ស័យដែលស្លាប់ គឺមិនទាន់មានប្រភពអះអាងបញ្ជាក់អោយដឹងនៅ​ឡើយនោះទេ ៕

អត្ថបទ៖ លីហេង