ស្នងការខេត្តកណ្ដាល ៖ ហេតុការណ៍កើតឡើងនៅកាស៊ីណូមួយកន្លែង ក្នុងស្រុកកោះធំនោះ មិនមែនជាករណីហិង្សាទេ

ស្នងការនគរបាលខេត្តកណ្ដាល បានអះអាងថា ហេតុការណ៍ដែលកើតឡើងនៅក្នុងកាស៊ីណូដំរី ២ ស្ថិតនៅតំបន់ជ្រៃធំ ស្រុកកោះធំ ខេត្តកណ្ដាលនោះ មិនមែនជាករណីហិង្សានោះទេ តែជាករណីបុគ្គលិកជនជាតិវៀតណាម រៀបចំផែនការប្រមូលគ្នាទំលុសទ្វាររបងរត់ចេញ ប៉ះគ្នាជាមួយសន្តិសុខ។

ការអះអាងនេះ បន្ទាប់ពីសេចក្ដីរាយការណ៍ថា នៅវេលាថ្ងៃត្រង់ ថ្ងៃទី ១៨ ខែសីហា ឆ្នាំ ២០២២នេះ មានករណីអំពើហិង្សាមួយបានកើត ដោយគេឃើញមានមនុស្សរត់ចេញពីអគារមួយកន្លែងជាច្រើននាក់ ដោយអ្នកខ្លះមានកាន់ដំបងផងដែរ។ ហេតុការណ៍នេះ បានកើតឡើងនៅក្នុងកាស៊ីណូដំរី ២ ស្ថិតនៅតំបន់ជ្រៃធំ ស្រុកកោះធំ ខេត្តកណ្តាល។

សេចក្ដីរាយការណ៍ដដែល បានឲ្យដឹងថា ករណីនេះ កើតឡើងដោយសារតែមានការរក្សាទុកមនុស្សមួយក្រុម ក្នុងកាស៊ីណូមួយកន្លែង ដោយពីដំបូងមានការភូតកុហកថា ជ្រើសរើសបុគ្គលិកទៅធ្វើការនៅកាស៊ីណូខេត្តព្រះសីហនុ តែបែរជាយកពួកគេទៅទុកនៅតំបន់ជ្រៃធំទៅវិញ។ រហូតដល់វេលាថ្ងៃត្រង់ ថ្ងៃព្រហស្បត្តិ៍នេះ មានការប្រទាញប្រទុងគ្នា រហូតកើតមានអំពើហិង្សា និងមានមនុស្សសំរុករត់ចេញមកក្រៅជាច្រើននាក់ ហើយខ្លះទៀតក៏រត់ចូលទឹកថែមទៀត។

យ៉ាងណាក៏ដោយលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាក់ប្រាប់ក្រុមអ្នកសារព័ត៌មានថា «ករណីនេះ មិនមែនហិង្សាទេ គឺបុគ្គលិកវៀតណាម រៀបចំផែនការប្រមូលគ្នាទំលុសទ្វាររបង រត់ចេញ ប៉ះគ្នាជាមួយសន្តិសុខ របួសសន្តិសុខ ៣នាក់ មូលហេតុនៃដើមរឿង ជំនាញខេត្តកំពុងធ្វើការជាមួយក្រុមហ៊ុន»៕