អគ្គិភ័យ​នៅ​ស្រុក​ស្នួល បង្កការភ្ញាក់ផ្អើលរហូត​​​​អភិបាលខេត្តចុះ​ដឹកនាំ​បញ្ជាផ្ទាល់

កាលពីវេលាម៉ោង​ ១០:០០ នាទីយប់ ថ្ងៃទី​២០ ខែ​ធ្នូ ឆ្នាំ២០២២ មានករណីអគ្គិភ័យឆាបឆេះផ្ទះល្វែង និងឃ្លាំងដាក់សម្ភារមួយកន្លែង បង្កឲ្យមានការភ្ញាក់ផ្អើលដល់ពលរដ្ឋនៅជុំវិញផ្សារស្នួលទាំងមូល និងមានការចុះ​ជួយអន្តរាគមភ្លាមៗពីអាជ្ញាធរស្រុក និងកម្លាំងអធិកាស្រុកស្នួលដែលនៅជិតទីនោះ។

នៅក្នុងហេតុការនោះដែរក៏មានការចុះទៅពិនិត្យនិងដឹកនាំបញ្ជាផ្ទាល់ពីលោក វ៉ា ថន អភិបាលខេត្តក្រចេះ រួមទាំង​ស្នងការនគរបាលខេត្តក្រចេះផងដែរ។

ប្រភពពីសមត្ថកិច្ចបានឲ្យដឹងថា ករណីអគ្គីភ័យនេះបណ្ដាលអោយឆេះផ្ទះថ្ម ១ល្វែង ទំហំ​ ៥ម៉ែត្រ​ X ៣៥ម៉ែត្រ​ កំពស់ ៣ជាន់ ខូចខាតប្រហែល ៤០% និងឆេះឃ្លាំងដាក់សម្ភារ ទំហំ ៥ម៉ែត្រ X ៣០ម៉ែត្រ ធ្វើអំពីដែកប្រក់ស័ង្កសី ស្ថិតនៅចំណុចផ្សារស្នួល ភូមិក្បាលស្នួល ឃុំស្នួល ស្រុកស្នួល ខេត្តក្រចេះ។

បើតាម​សមត្ដកិច្ច មូលហេតុដែលបង្កឲ្យកើតមានករណីអគ្គីភ័យនេះកើតឡើង គឺបណ្ដាលមកពីឆ្លងចរន្តអគ្គីសនី។ ម្ចាស់ផ្ទះមានឈ្មោះ ម៉ន ចន្ធូ ភេទ​ប្រុស​ អាយុ​៣៧ឆ្នាំ​ ជនជាតិខ្មែរ និងប្រពន្ធឈ្មោះ​ ពៅ ដាលីន អាយុ​៣៥ឆ្នាំ​ ជនជាតិខ្មែរ មុខរបរលក់ដូរ គឺពុំមាននរណាម្នាក់រងរបួសឡើយ ដោយគ្រាន់តែខូចខាតសម្ភារៈ​មួយចំនួនធំ ដោយសរុបទឹកប្រាក់ប្រមាណជា ៥០.០០០ដុល្លារ

ក្នុងកិច្ចការងាជួយអន្តរាគមនោះ កម្លាំងនគរបាលនៃស្នងការរដ្ឋាននគរបាលខេត្តបានប្រើប្រាស់រថយន្តពន្លត់អគ្គីភ័យចំនួន ៥ គ្រឿង និងរថយន្តដឹកទឹករបស់ក្រុមហ៊ុនចំការកៅស្នួលចំនួន ២ គ្រឿង សរុបចំនួន ៧ គ្រឿង ដោយប្រើប្រាស់ទឹកសរុបអស់ចំនួន ១៥ រថយន្ត ទើបរលត់ទាំងស្រុងនៅវេលាម៉ោង ២និង៤៥នាទីឈានចូលថ្ងៃទី២១ ខែធ្នូ ឆ្នាំ២០២២៕