អភិបាលក្រុងព្រះសីហនុ លោក សរ កក្កដា បានរិះគន់បុគ្គលមួយចំនួនតូចអន់មាយាទ ស៊ីហើយចោលថែមទាំងជុះទៀតផងនៅទីលានកន្ទុយនាគ។

រដ្ឋបាលក្រុងព្រះសីហនុសហការជាមួយស្នងការដ្ឋាននគរបាលខេត្តព្រះសីហនុធ្វើការលាងសម្អាតបរិវេណទីតាំងទីលានតេជោដើម្បីបំបាត់ក្លិនមិនល្អបណ្ដាលមកពីបុគ្គលមាយាទមិនសូវបាន មួយចំនួនតូច ដែលបានស៊ី រួចហើយចោល និងជុះពាសវាលពាសកាល។

សូមបញ្ជាក់ផងដែរថា ទីលានតេជោ (កន្ទុយនាគ) ជាកន្លែងដ៏ពេញនិយមនិងទាក់ទាញដល់ភ្ញៀវទេសចរជាតិនិងអន្តរជាតិ នាំគ្នាដើរហាត់ប្រាណនិងអង្គុយលេងកំសាន្តស្រូបយកខ្យល់អាកាសបរិសុទ្ធពីរសមុទ្រ ក្នុងពេលជាមួយគ្នានេះផងដែរក៏មានបងប្អូនមួយចំនួនបានយកម្ហូបអាហារម្ហូបចុកនៅលើទីលាន ដោយអ្នកខ្លះក្រោយពីហូបរួចហើយមិនបានយកកាកសំណល់ទៅទុក្ខដាក់នៅក្នុងធុងសំរាមឲ្យបានត្រឹមត្រូវនោះទេ ពោលហូបកន្លែងណាបោះចោលកន្លែងហ្នឹងពាស​វាលពាសកាលមិនខ្វល់សោះឡើយ។

សូមបញ្ជាក់ថា នៅរសៀលថ្ងៃទី ១២ ខែកុម្ភៈម្សិលមិញនេះ បន្ទាប់ពីលោកអភិបាលក្រុងព្រះសីហនុមានការបង្ហោះសារ​រិះគន់ករណីបំពុលបរិស្ថាននៅបរិវេណទីលានតេជោ មន្ត្រីសាលាក្រុងព្រះសីហនុជាច្រើននាក់បានសហការជាមួយកម្លាំងស្នងការដ្ឋាននគរបាលខេត្តព្រះសីហនុ ព្រមទាំងមានការចូលរួមពីក្រុមហ៊ុនសំរាមKSWM បានធ្វើការសំអាតសំរាម និងលាងសម្អាតបរិវេណទីតាំងទីលានតេជោដើម្បីបំបាត់ក្លិនមិនល្អ៕

អត្ថបទ៖ ស៊ុយ ចាន់ធា