បន្ទាប់ពីប្រកាសតែងតាំងជាស្នងការនៃស្នងការដ្ឋាននគរបាលខេត្តព្រៃវែងរួចមក លោកឧត្ដមសេនីយ៍ទោ ឈឿន ប៊ុនឆន បានដឹកនាំកម្លាំងចុះសំណេះសំណាលផ្ទាល់ជាមួយកងកម្លាំងវរ:សេនាតូចនគរបាលការពារព្រំដែនគោកលេខ៦០៧ ស្ថិតក្នុងភូមិសំរោង ឃុំល្វា ស្រុកព្រះស្ដេច។

ក្នុងការជួបសំណេះសំណាល លោកឧត្តមសេនីយ៍ទោ ឈឿន ប៊ុនឆន បានប្រកាសឱ្យកងកម្លាំងវរ:សេនាតូចនគរបាលការពារព្រំដែនគោកលេខ ៦០៧ ត្រៀមលក្ខណៈសម្បត្តិឱ្យបានគ្រប់គ្រាន់ ដើម្បីទទួលការហ្វឹកហ្វឺននាពេលខាងមុខដ៏ខ្លីនេះ។ លោកស្នងការបព្ជាក់ថា លោកមានគម្រោងនឹងបញ្ជូនគ្រូបង្គោលកម្រិតខ្ពស់មកធ្វើការហ្វឹកហាត់ផ្ទាល់ដល់មូលដ្ឋានដើម្បីបង្កើនសមត្ថភាព ពិសេសលើយុទ្ធវិធី បន្តក្លាយជានគរបាលដែលមានគុណភាពបម្រើជាតិ និងប្រជាជន។

លោកស្នងការថ្មីរូបនេះជឿជាក់ថា កងកម្លាំងនគរបាលទូទាំងខេត្តព្រៃវែង នឹងយល់ពីទិសដៅរបស់លោក ហើយលោកក៏សង្ឃឹមថា ប្រជាពលរដ្ឋទាំងអស់ក្នុងខេត្តព្រៃវែងនឹងផ្តល់ឱកាសឱ្យលោក។

លោកឧត្ដមសេនីយ៍ទោ ឈឿន ប៊ុនឆន ត្រូវបានប្រកាសតែងតាំងជាស្នងការនគរបាលខេត្តព្រៃវែង កាលពីថ្ងៃទី១៣ ខែមីនា ឆ្នាំ២០២៣នេះ ជំនួសលោកឧត្ដមសេនីយ៍ទោ ព្រុំ សន្ធរ ដែលត្រូវតែងតាំងជាអគ្គស្នងការរងនគរបាលជាតិ៕

អត្ថបទ៖ សុខុម