កាប់ប្រហារប្រពន្ធ និងកូនស្រី បន្ទាប់ពីរងការជេរប្រមាថ និងជះទឹកនោមដាក់ពេលត្រឡប់ពីផឹកស៊ី

បុរសជាជនដៃដល់វ័យ៣៨ឆ្នាំម្នាក់ត្រូវបានកម្លាំងនគរបាលស្រុកកញ្ច្រៀច ខេត្តព្រៃវែង ចុះឃាត់ខ្លួនបន្ទាប់ពីកាប់ប្រហារប្រពន្ធ និងកូនស្រីខ្លួនឯងបណ្ដាលឲ្យរងរបួសធ្ងន់ ក្រោយរងការជេរប្រមាថ និងជះទឹកនោមដាក់ ខណៈដែលបុរសរូបនោះទើបត្រឡប់មកពីផឹកស៊ីវិញ។

ករណីកាប់ប្រហារប្រពន្ធកូនខ្លួនឯងបណ្ដាលឲ្យរងរបួសធ្ងន់នេះ បានកើតឡើងកាលពីវេលាម៉ោង២១និង០០នាទី ថ្ងៃទី០៩ ខែកក្កដា ឆ្នាំ២០២៣ នៅចំណុចភូមិក្រូច ឃុំក្ដឿងរាយ ស្រុកកញ្ជ្រៀច ខេត្តព្រៃវែង។

តាមរបាយការណ៍សមត្ថកិច្ច ជនដៃដល់មានឈ្មោះ ទូច ចាន់ ភេទប្រុស អាយុ៣៨ឆ្នាំ រស់នៅភូមិក្រូច ឃុំក្ដឿងរាយ ស្រុកកញ្ជ្រៀច ខេត្តព្រៃវែង។ ចំណែកជនរងគ្រោះជាប្រពន្ធ និងកូនមានឈ្មោះ ផល ស៊ាងរ៉ា ភេទស្រី អាយុ៣៩ឆ្នាំ ជនជាតិខ្មែរ រស់នៅភូមិក្រូច ឃុំក្ដឿងរាយ ស្រុកកញ្ជ្រៀច ខេត្តព្រៃវែង មុខរបរកសិករ រងរបួសធ្ងន់។ ឈ្មោះ ចាន់ ឌី ភេទស្រី អាយុ១៥ឆ្នាំ ជនជាតិខ្មែរ រស់នៅភូមិក្រូច ឃុំក្ដឿងរាយ ស្រុកកញ្ជ្រៀច ខេត្តព្រៃវែង មុខរបកសិករ រងរបួសធ្ងន់។

របាយការណ៍សមត្ថកិច្ចបញ្ជាក់ថា នៅវេលាកើតហេតុ ជនដៃដល់បានមកពីផឹកស៊ីនៅខាងក្រៅផ្ទះ ពេលត្រឡប់មកដល់ផ្ទះជនរងគ្រោះជាប្រពន្ធបានស្តីបន្ទោស និងជេរប្រមាថ។ ពេលនោះជនដៃដល់ជាប្ដីបានឃាត់កុំឱ្យជេរ តែជនរងគ្រោះជាប្រពន្ធមិនព្រមឈប់នោះទេ និងបានយកទឹកនោមក្នុងកន្ថោរមកជះទៅលើជនសង្ស័យជាប្ដី រួចរុញបណ្តាលឱ្យដួលទៀត ហើយក៏បានប្រតាយប្រតប់គ្នា។ បន្ទាប់មកជនសង្ស័យជាប្តី បានដើរទៅចង្ក្រានបាយរួចទាញកាំបិតប៉័ងតោកាប់ទៅលើប្រពន្ធជាច្រើនកាំបិត ហើយពេលកូនស្រីចូលទៅជួយ ក៏កាប់ទាំងកូនស្រីទៀត បណ្តាលឱ្យរងរបួសធ្ងន់ទាំង២នាក់តែម្តង។

បន្ទាប់ពីកាប់ប្រហារប្រពន្ធ និងកូនរួច ជនដៃដល់បានរត់គេចខ្លួនទៅផ្ទះមិត្តភក្តិ នៅភូមិតាណាល ឃុំក្ដឿងរាយ ស្រុកកញ្ជ្រៀច ហើយក៏ត្រូវកម្លាំងនគរបាលខេត្តព្រៃវែង ចាប់ឃាត់ខ្លួនបានតែម្តង។

ជនសង្ស័យត្រូវបានកម្លាំងនគរបាលនៃអធិការដ្ឋាននគរបាលស្រុកកញ្ជ្រៀច ឃាត់ខ្លួនបណ្ដោះអាសន្នដើម្បីរៀបចំកសាងសំណុំរឿងបញ្ជូនបន្តអនុវត្តតាមនិតិវីធីច្បាប់៕

អត្ថបទ៖ សុខុម