ខេត្តព្រៃវែងត្រៀមកម្លាំងជាង៤ពាន់នាក់ ដើម្បីការពារសន្តិសុខសណ្ដាប់ធ្នាប់នៅថ្ងៃបោះឆ្នោត

ដើម្បីត្រៀមការពារសន្តិសុខសណ្ដាប់ធ្លាប់ជូនប្រជាពលរដ្ឋ ក៏ដូចជាថ្នាក់ដឹងនាំនៅថ្ងៃបោះឆ្នោតជ្រើសតាំងដំណាងរាស្ដ្រនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ខាងមុខនេះ ខេត្តព្រៃវែងបានត្រៀមកម្លាំងសរុប៤៤៦៨នាក់ មកពីបួនអង្គភាព។

ក្នុងបទសម្ភាសជាមួយស្ថាប័នសារព័ត៌មានក្នុងស្រុក លោកឧត្ដមសេនីយ៍ទោ ឈឿន ប៊ុនឆន ស្នងការនៃស្នងការដ្ឋាននករបាលខេត្តព្រៃវែង បានឲ្យដឹងថា នៅថ្ងៃបោះឆ្នោតជ្រើសតាំងដំណាងរាស្ដ្រនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ខាងនេះ គណៈបញ្ជាការឯកភាពរដ្ឋបាលខេត្តព្រៃវែងបានត្រៀមកម្លាំងសរុប៤៤៦៨នាក់ ដើម្បីការពារសន្តិសុខសណ្ដាប់ធ្នាប់ជូនប្រជាពលរដ្ឋ និងថ្នាក់ដឹកនាំដែលមកចូលរួមបោះឆ្នោត។

លោកឧត្ដមសេនីយ៍ទោស្នងការខេត្តបន្ថែមថា កម្លាំងទាំងអស់នេះមិនមែនមានតែកម្លាំងនគរបាលជាតិនោះទេ គឺទាំងកម្លាំងកងរាជអាវុធហត្ថខេត្ត កម្លាំងបញ្ជាការសឹករងខេត្ត និងកម្លាំងប្រជាការពារផងដែរ។

លោកឧត្ដមសេនីយ៍ទោ ឈឿន ប៊ុនឆន បញ្ជាក់ថា នៅទូទាំងខេត្តព្រៃវែង មានការិយាល័យបោះឆ្នោតសរុបចំនួន១៨៦៩​ការិយាល័យ និងបានបែងចែកកម្លាំងស្នងការនគរបាលខេត្ត កម្លាំងអធិការស្រុក និងកម្លាំងប៉ុស្ដិ៍ ព្រមទាំងកម្លាំងប្រជាការពារទៅគោលដៅការិយាល័យនីមួយៗរួចរាល់។

លោកឧត្ដមសេនីយ៍ទោ ឈឿន ប៊ុនឆន ក៏សូមសំណូមពរដល់ប្រជាពលរដ្ឋសូមជួយសហការថែរក្សាសន្តិសុខសណ្ដាប់​ធ្នាប់នៅក្នុងថ្ងៃបោះឆ្នោតឲ្យបានល្អ៕

អត្ថបទ៖ សុខុម