អ្នកបង្ហោះសារចោទប៉េអឹម(PM)ថា ដេញប្លន់ដល់បុរីនៅព្រែកឯងចេញមុខសុំទោស

អ្នកនាង ហ៊ុន គីមឡា ម្ចាស់អាខោន Mey Mey Kim ម្ចាស់ហាង បោកអ៊ុតស្អាតជានិច្ច បានចេញមុខសុំទោសកងរាជអាវុធហត្ថ បន្ទាប់ពីបង្ហោះវីដេអូ ភ្ជាប់ជាមួយខ្លឹមសារតាមបណ្ដាញសង្គមថា មានករណីដេញប្លន់ដល់បុរីក្រោយផ្សារព្រែកឯង។

អ្នកនាង ហ៊ុន គីមឡា អាយុ៣២ឆ្នាំរស់នៅក្នុងបុរី The wood សង្កាតព្រែកឯង ខណ្ឌច្បារអំពៅ បានសូមទោសចំពោះកងរាជអាវុធហត្ថ និងសារភាពថា មូលហេតុដែលនាងនិយាយប៉ះពាល់ PM គឺដោយសារនាងឃើញរថយន្តដែលដេញតាមនាងមានបំពាក់ស៊ឺរ៉ែននៅពីលើ ទើបនាងមានការភ័ន្តច្រឡំជារថយន្ត PM ជាអំពើអចេតនា។ លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានអំពាវនាវឱ្យសារព័ត៌មានកែតម្រូវករណីនេះ។

កាលពីថ្ងៃទី ៨ ខែកក្កដា ម្ចាស់គណនីហ្វេសប៊ុកឈ្មោះ Mey Mey Kim បានបង្ហោះថា ខ្លួនបានជួបជាមួយក្រុមចោរមួយក្រុមមានឡាន២គ្រឿង ម៉ូតូ៣គ្រឿង និងមានអាវុធក្នុងដៃ និងឡានមួយគ្រឿងទៀតមានសារ៉ែននៅពីលើបានស្ទាក់រូបគាត់ពីមាត់ផ្លូវចូលផ្ទះរហូតដល់ក្នុងបុរី៕