សន្តិសុខសង្គម

ស្នងការខេត្តសៀមរាប ត្រៀមកម្លាំង៤ពាន់នាក់សម្រាប់ការពារថ្ងៃបោះឆ្នោតខាងមុខ

បានផុស

២ years មុន

នៅ

ថ្ងៃសុក្រ ២១ កក្កដា ២០២៣

ដោយ

កម្លាំងសមត្ថកិច្ចចម្រុះនៃខេត្តសៀមរាប ប្រមាណជាង៤ពាន់នាក់ ត្រូវបានចាត់តាំង និងទទួលភារកិច្ចក្នុងកិច្ចការពារ ហិបឆ្នោត និងមណ្ឌលបោះឆ្នោត ដើម្បីរក្សាសន្តិសុខសណ្ដាប់ធ្នាប់ ក្នុងថ្ងៃបោះឆ្នោតនាពេលខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្ដមសេនីយ៍ទោ តេង ច័ន្ទណាត ស្នងការនគរបាលខេត្តសៀមរាបបានឲ្យដឹងនៅរសៀលថ្ងៃទី២០ ខែកក្កដា ឆ្នាំ២០២៣នេះថា នៅមុនថ្ងៃបោះឆ្នោត និងថ្ងៃបោះឆ្នោតនាពេលដ៏ខ្លីខាងមុខនេះ លោកបានចាត់តាំងកម្លាំងនគរបាល និងប្រជាការពារសរុបចំនួន៤០០០នាក់ ដើម្បីត្រៀមលក្ខណៈចុះតាមមូលដ្ឋាន ក្នុងកិច្ចការពារមណ្ឌលបោះឆ្នោត និងហិបឆ្នោត ព្រមទាំងការការពារសន្តិសុខជូនប្រជាពលរដ្ឋក្នុងថ្ងៃបោះឆ្នោតផងដែរ។

លោកឧត្ដមសេនីយ៍ទោ បន្ថែមថា ការិយាល័យបោះឆ្នោតនៅទូទាំងខេត្តសៀមរាប គឺមានចំនួន១៥២១ការិយាល័យ ស្មើនឹង៨៥០ មណ្ឌល។ លោកឧត្ដមសេនីយ៍ទោ បានសង្កត់ធ្ងន់ថា កម្លាំងសមត្ថកិច្ចចាប់ផ្ដើមពង្រឹងការពារសន្តិសុខយ៉ាងម៉ឺងម៉ាត់ចាប់ពីពេលនេះតទៅហើយ ព្រោះនៅថ្ងៃទី២១កក្កដានេះ គឺជាថ្ងៃដែលគណបក្សប្រជាជន រៀបចំពិធីក្បួនដង្ហែក្នុងលក្ខណៈទ្រង់ទ្រាយធំចុងក្រោយ ដូច្នេះកម្លាំងត្រូវបង្កើនកិច្ចការពារសន្តិសុខជូនប្រជាពលរដ្ឋ។

សូមបញ្ជាក់ផងដែរថា នៅខេត្តសៀមរាបមានគណបក្សនយោបាយឈរឈ្មោះចំនួន១៤គណបក្ស៕

អត្ថបទ៖ កុសល