តុលាការកំពុងកាត់ទោសអតីតអគ្គនាយករងអាកាសចរណ៍សុីវិលដកកាំភ្លើងគំរាមក្មេង

ចៅក្រមសាលាដំបូងរាជធានីភ្នំពេញ នៅព្រឹកថ្ងៃទី១៤ ខែកញ្ញា ឆ្នាំ២០២៣នេះ បាននិងកំពុងកាត់ទោសអតីតអគ្គនាយករង នៃអគ្គនាយកដ្ឋានរដ្ឋបាល និងកិច្ចការទូទៅរបស់រដ្ឋលេខាធិការដ្ឋានអាកាសចរស៊ីវិលលោក បែល វ៉ាន់ដែត ដែលកំពុងជាប់ឃុំឃាំងនៅពន្ធនាគារព្រៃស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សេង លៀង ចៅក្រមជំនុំជំរះបានប្រកាសថា តុលាការបានចោទប្រកាន់លោក បែល វ៉ាន់ដេត ពីបទ «កាន់កាប់ អាវុធដោយគ្មានការអនុញ្ញាត និងបទ គំរាមកំហែងថានឹងសម្លាប់»។ ក្នុងសវនាការជនជាប់ចោទបានសារភាពនូវកំហុសរបស់ខ្លួន ហើយសុំអោយតុលាការបន្ធូបន្ថយទោស។ តុលាការបានកំណត់យកថ្ងៃទី២២ ខែកញ្ញានេះ ដើម្បីប្រកាសសាលក្រម ។

សមត្ថកិច្ចបានចាប់ខ្លួនលោក បែល វ៉ាន់ដេត សាជាថ្មីកាលពីថ្ងៃទី២១ ខែមេសា ឆ្នាំ២០២៣។ ចៅក្រមស៊ើបសួរសាលាដំបូងរាជធានីភ្នំពេញបានចេញដីកា បង្គាប់ឲ្យចាប់ខ្លួនលោក បែល វ៉ាន់ដែត អាយុ៣៨ឆ្នាំតាមមាត្រា១៩៥ និងមាត្រា ១៩៦ នៃក្រមព្រហ្មទណ្ឌ និងបង្គាប់ឱ្យឃុំខ្លួនដាក់ពន្ធនាគារក្រោយពីជននេះមិនបានគោរពកាតព្វកិច្ចដែល ហាមទៅគំរាមកំហែង ឬទៅបរិវេណលំនៅឋានរបស់ជនរងគ្រោះ ឬដើមបណ្តឹងរដ្ឋប្បវេណី។

ការចាប់ខ្លួនឡើងវិញនេះ បន្ទាប់ពីសម្ដេច ហ៊ុន សែន បានបញ្ជាឱ្យក្រសួងយុត្តិធម៌ និងតុលាការត្រូវចាត់វិធានការឡើងវិញចំពោះមន្ត្រីជាន់ខ្ពស់អាកាសចរណ៍ស៊ីវិលលោក បែល វ៉ាន់ដែត ដែលបានប្រើប្រាស់កាំភ្លើងគំរាមបាញ់សម្លាប់យុវជនម្នាក់ បន្ទាប់ពីតុលាការបានដោះលែងមន្ត្រីរូបនោះឱ្យនៅក្រៅឃុំ។

ចៅក្រមស៊ើបសួរនៃសាលាដំបូងរាជធានីភ្នំពេញលោកស្រី អ៊ុក រ៉េតគន្ធា បានដោះលែងលោក បែល វ៉ាន់ដែត ឱ្យនៅក្រ ឃុំបន្ទាប់ពីមន្ត្រីរូបនេះត្រូវបានចោទប្រកាន់កាលពីថ្ងៃទី៣១មីនា ឆ្នាំ២០២៣ ពីបទ «កាន់កាប់អាវុធដោយគ្មានការអនុញ្ញាត និងបទគំរាមកំហែងថានឹងសម្លាប់»។

រាជរដ្ឋាភិបាលបានចេញអនុក្រឹត្យកាលពីថ្ងៃទី១១ ខែមេសា ឆ្នាំ២០២៣ដើម្បីបញ្ចប់មុខតំណែងលោក បែល វ៉ាន់ដែត ចេញពីតួនាទីជា អគ្គនាយករងនៃអគ្គនាយកដ្ឋានរដ្ឋបាល និងកិច្ចការទូទៅនៃរដ្ឋលេខាធិការដ្ឋាន អាកាសចរណ៍ស៊ីវិល៕

អត្ថបទ៖ មករា