ស្នងការរាជធានី តែងតាំងលោក សំ វិច្ឆិកា ជានាយការិយាល័យផ្សព្វផ្សាយអប់រំ និងជាអ្នកនាំពាក្យ

លោកឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនៃស្នងការដ្ឋាននគរបាលរាជធានីភ្នំពេញ បានប្រកាសតែងតាំងលោកវរសេនីយ៍ឯក សំ វិច្ឆិកា អត្តលេខ ៦០២៦៥ ជានាយការិយាល័យផ្សព្វផ្សាយអប់រំ និងជាអ្នកនាំពាក្យ របស់ស្នងការដ្ឋាននគរបាលរាជធានីភ្នំពេញ។ នេះបើតាមសេចក្ដីប្រកាសចេញនៅថ្ងៃទី២៥ ខែកញ្ញា ឆ្នាំ២០២៣​ដែលក្រុមការងារយើងទើបទទួលបាន។

យោងតាមសេចក្ដីប្រកាស ភារកិច្ចរបស់អ្នកនាំពាក្យ ត្រូវប្រមូលរាល់ព័ត៌មានពីគ្រប់មជ្ឈដ្ឋានជាតិ អន្តរជាតិ លើកឡើងពាក់ព័ន្ធបាតុភាពអសកម្ម ក្នុងការអនុវត្តតួនាទី ភារកិច្ច របស់កងកម្លាំងនគរបាល នៃស្នងការដ្ឋាននគរបាលរាជធានីភ្នំពេញ ដើម្បីឆ្លើយតបដោយប្រសិទ្ធភាព ទាន់ពេលវេលា មានវិជ្ជាជីវៈ និងសុជីវធម៌ ។ សហការសម្របសម្រួលជាមួយគ្រប់ផែនការងារជំនាញទាំង១៣ ការិយាល័យជំនាញពាក់ព័ន្ធ អធិការដ្ឋាននគរបាលខណ្ឌទាំង១៤ ដើម្បីប្រមូលផ្ដុំព័ត៌មានបានគ្រប់ជ្រុងជ្រោយ សម្រាប់ជាមូលដ្ឋានក្នុងការបកស្រាយ ជូនសាធារណៈជន ។

រាល់ព័ត៌មាន មុនបកស្រាយបំភ្លឺក្នុងផេកផ្លូវការ និងគេហទំព័ររបស់ស្នងការដ្ឋាននគរបាលរាជធានីភ្នំពេញ ត្រូវសុំគោលការណ៍ណែនាំពី អគ្គស្នងការរង និងជាស្នងការនគរបាលរាជធានីភ្នំពេញ។ មានភារកិច្ចទទួលបន្ទុកអនុវត្តការងារមួយចំនួនទៀត ដែលថ្នាក់ដឹកនាំប្រគល់ជូន៕

អត្ថបទ៖ សុខុម