កម្ពុជា បណ្ដេញជនសង្ស័យជប៉ុន២៥នាក់ចេញពីប្រទេស ក្រោយប្រព្រឹត្តអំពើឆបោកតាមអនឡាញ

អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍ នៅរសៀលថ្ងៃទី០៨ ខែវិច្ឆិកាឆ្នាំ២០២៣នេះ បានសហការបណ្ដេញជនសង្ស័យសញ្ជាតិជប៉ុនចំនួន២៥នាក់ រួមជាមួយវត្ថុតាងចេញពីប្រទេសកម្ពុជា ក្រោយជនសង្ស័យទាំងនេះ យកទឹកដីកម្ពុជាប្រពឹត្តបទល្មើសឆបោកតាមប្រព័ន្ធអនឡាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យទាំងនេះ ត្រូវបានបង្ក្រាបកាលពីថ្ងៃទី១១ ខែកញ្ញា ឆ្នាំ២០២៣ កន្លងទៅ នៅទីតាំងអាគារមួយកន្លែង ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ពាក់ព័ន្ធនឹងការលួចលាក់ធ្វើសកម្មភាពឆបោកតាមប្រព័ន្ធទូរស័ព្ទ ទៅលើជនរងគ្រោះនៅប្រទេសជប៉ុន។

ជុំវិញប្រតិបត្តការបញ្ជូនជនសង្ស័យ និងវត្ថុតាង ចេញពីកម្ពុជាទៅកាន់ប្រទេសជប៉ុននេះ  ទីភ្នាក់ងារនគរបាលជាតិជប៉ុន បានសហការជាមួយកម្ពុជា ដោយភាគីជប៉ុនបានបញ្ជូនយន្តហោះឈ្មោះ Malaysia Airlines និងកងកម្លាំងនគរបាលជប៉ុនមកអមជនសង្ស័យ ដើម្បីយកជនសង្ស័យទាំង២៥នាក់នេះ ទៅអនុវត្តនីតិវិធីផ្តន្ទាទោសនៅក្នុងប្រទេសជប៉ុន។

ក្នុងឱកាសបណ្ដេញជនសង្ស័យជនជាតិជប៉ុនចេញពីកម្ពុជា  សមត្ថកិច្ចនគរបាលកម្ពុជា បានដាស់តឿន និងក្រើនរម្លឹក ដល់ប្រជាពលរដ្ឋដែលជាម្ចាស់អាគារជួល ឬទីតាំងជួលនានា ឲ្យមានការយកចិត្តទុកដាក់ខ្ពស់ ចំពោះការជួលទីតាំងរបស់ខ្លួនទៅឲ្យជនបរទេស ដោយត្រូវសាកសួរព័ត៌មានអំពីគោលបំណងនៃការជួល និងត្រូវមានពិនិត្យឲ្យបានច្បាស់លាស់ ចៀសវាងនាំឲ្យទៅតាំងរបស់ខ្លួនត្រូវបានប្រើប្រាស់ធ្វើសកម្មភាពបទល្មើស ឬខ្លួនផ្ទាល់អាចក្លាយទៅជាអ្នកសម្រួលផ្ដល់ទីតាំងដល់ប្រពឹត្តបទល្មើសផងដែរ៕