ទំនាស់ក្នុងគ្រួសារនគរបាលម្នាក់​យក​កាំភ្លេីងបាញ់សម្លាប់ខ្លួនឯង

បុរសម្នាក់ជាមន្ត្រីនគរបាលជាតិបានយកកាំភ្លេីងខ្លីបាញ់ក្បាលសម្លាប់ខ្លួនឯងបណ្តាលឱ្យស្លាប់ក្នុងថ្លុកឈាមក្រោយពីទំនាស់ពាក្យសម្ដីជាមួយប្រពន្ធបន្តិចបន្តួច។

ហេតុការណ៍នេះបានបង្កការភ្ញាក់ផ្អេីលកាលពីវេលាម៉ោង១០និង៣០នាទីយប់ ថ្ងៃទី១៤ ខែធ្នូ ឆ្នាំ២០២៣ នៅចំណុចផ្ទះគ្មានលេខ ផ្លូវលំ ស្ថិតនៅភូមិខ្វែ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។ សពជនរងគ្រោះមានឈ្មោះ ណយ ផារ៉ា ភេទប្រុស អាយុ៣៦ឆ្នាំ ជនជាតិខ្មែរ មុខរបរនគរបាលអង្គភាពតម្រួតបទបញ្ជា។ ស្នាក់នៅផ្ទះគ្មានលេខ ផ្លូវលំ ស្ថិតក្នុងភូមិខ្វែ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។ មានស្រុកកំណេីតនៅភូមិលោង សង្កាត់សុភ័រទេព ក្រុងច្បារមន ខេត្តកំពង់ស្ពឺ។

តាមប្រភពព័ត៌មានបានឱ្យដឹងថា មុនពេលកេីតហេតុប្រពន្ធជនរងគ្រោះបានទូរស័ព្ទទៅប្តី(ជនរងគ្រោះ) ចូលតែមិនមានអ្នកលេីក មួយសន្ទុះក្រោយមកជនរងគ្រោះក៏មកដល់ផ្ទះ ពេលនោះប្រពន្ធក៏សួរនាំបន្តិចបន្តួចក៏កេីតជាជម្លោះក៏ប្រពន្ធ​ដេញឱ្យដេកក្រៅផ្ទះ។

ប្រភពដដែលបានបន្តថា ខណៈជនរងគ្រោះកំពុងដេកនៅមុខផ្ទះស្រាប់តែប្រពន្ធយកទឹកមកជះលើជនរងគ្រោះស្រែកហៅឱ្យទៅដេកក្នុងផ្ទះវិញ ភ្លាមនោះជនរងគ្រោះដេីរចូលទៅក្នុងបន្ទប់យកកាំភ្លេីងខ្លីម៉ាក: NP42.9 បាញ់ក្បាលខ្លួនឯងស្លាប់ភ្លាមៗតែម្តង។

ក្រោយកេីតហេតុសមត្ថកិច្ចមូលដ្ឋានបានចុះដល់ចំណុចកេីតហេតុពិនិត្យជាក់ស្ដែងកន្លែងកើតហេតុ និងការបញ្ជាក់ពីលោកឧកញ៉ាវេជ្ជបណ្ឌិត នង សុវណ្ណារ័ត្ន គ្រូពេទ្យកោសល្យវិច្ច័យអមសាលាដំបូងរាជធានីភ្នំពេញ សន្និដ្ឋានឃើញថា សពស្លាប់ដោយសារធ្វើអត្តឃាត(បាញ់សម្លាប់ខ្លួនឯង)រួចប្រគល់ទៅក្រុមគ្រួសារយកទៅធ្វេីបុណ្យតាមប្រពៃណីនៅស្រុកកំណេីត៕

អត្ថបទ៖ សុខា