ព្រឹកមិញ មានអគ្គិភ័យនៅសាកលវិទ្យាល័យភូមិន្ទភ្នំពេញ តែអាចគ្រប់គ្រងបានទាំងស្រុង

កាលពីវេលាព្រឹកម៉ោង​០៦:៥០នាទី ថ្ងៃសុក្រនេះ មានករណីអគ្គិភ័យមួយកើតឡើងនៅចំណុចសកលវិទ្យាល័យភូមិន្ទភ្នំពេញ នៅតាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកល្អក់១ ខណ្ឌទួលគោក។ ជុំវិញករណីនេះ មន្ត្រីជំនាញពន្លត់បានទាន់ពេលវេលា។ នេះបើតាមការផ្សព្វផ្សាយរបស់ស្នងការនគរបាលរាជធានីភ្នំពេញនៅព្រឹកថ្ងៃទី៩ ខែកុម្ភៈនេះ។

តាមប្រភពដដែលបានបង្ហាញថា ហេតុការណ៍​អគ្គិភ័យឆាបឆេះនេះ គឺបណ្តាលមកពីឆ្លងចរន្តអគ្គិសនី។ អគ្គិភ័យនេះធ្វើឱ្យឆេះខូចខាតសម្ភារៈក្នុងបន្ទប់ជាន់ទី២ ទំហំ ០៤ម៉ែត្រx ០៤ម៉ែត្រ ចំនួន០១បន្ទប់ រួមមាន តុ, ទូ និងឯកសារអស់មួយចំនួន។

អគ្គិភ័យនេះត្រូវបានពន្លត់បានទាំងស្រុង នៅម៉ោង០៧:១៥នាទីព្រឹក ថ្ងៃទី០៩ ខែកុម្ភៈ ដោយប្រើប្រាស់រថយន្តពន្លត់អគ្គិភ័យរបស់ការិយាល័យអគ្គិភ័យ រាជធានីភ្នំពេញ ចំនួន ០១គ្រឿង ប្រើប្រាស់ទឹកអស់ចំនួន ០១ឡាន ស្មើនឹង ០៤ម៉ែត្រគូប៕