អ្នករងរបួសនៅគិរីរម្យ គឺដោយសារគ្រោះថ្នាក់ចរាចរណ៍ មិនមែនផ្ដើមចេញពីករណីហិង្សានោះទេ

ស្នងការដ្ឋាននគរបាលខេត្តកំពង់ស្ពឺបញ្ចាក់ថា ករណីបង្ហោះចែកចាយនៅលើបណ្ដាញសង្គមពាក់ព័ន្ធក្រុមក្មេងទំនើញ​ដេញកាប់គ្នាលើឧទ្យាន​ជាតិគីរីរម្យបណ្ដាលឲ្យមានអ្នកស្លាប់ ករណីនោះគឺផ្ដើមចេញពីគ្រោះថ្នាក់ចរាចរណ៍បណ្ដាលឲ្យជនរងគ្រោះរបួសធ្ងន់ ទើបក្រុមទាំងសងខាងទាញដំបង និងមែកឈើដេញវាយគ្នាជាក្រោយ មិនមែនជាករណីដេញកាប់គ្នានោះទេ។ បើតាមរបាយកាណ៍ ករណីនេះកម្លាំងសមត្ថកិច្ចបានឃាត់ខ្លួនសង្ស័យ៣នាក់ និងដកហូតម៉ូតូ៣គ្រឿង។

របាយការណ៍បញ្ចាក់ថា ករណីគ្រោះថ្នាក់ចរាចរណ៍បង្កចេញជាអំពើហិង្សានេះបានកើតឡើងកាលពីវេលាម៉ោង១៤និង​២០នាទី នៅលើឧទ្យាន​ជាតិគីរីរម្យចំណុចជិតរង្វង់មូលនាគព័ន្ធ រវាងម៉ូតូ​ម៉ាក​scopy-i បុកជាមួយម៉ូតូ​ម៉ាក​ឌ្រីមសង់​C125 សេរីឆ្នាំ២០២៤ ពណ៌ក្រហម បណ្ដាលឲ្យភាគីខាងម៉ូតូ​ម៉ាក​scopy-i របួសធ្ងន់ម្នាក់(អ្នកឌុប)កំពុងសំរាក​ព្យាបាលនៅមន្ទីរ​ពេទ្យផ្សារត្រែងត្រយឹង។

ប្រភពដដែលបញ្ជាក់ថា នៅវេលាកើតហេតុ ភាគីម៉ូតូ​ ​scopy-I គ្នានស្លាកលេខមានគ្នា២នាក់ជិះឌុបគ្នាទៅបុកម៉ូតូ​១​គ្រឿង ម៉ាក​ឌ្រីម​C125 សេរីឆ្នាំ២០២៤ ពណ៌​ក្រហ​ម ពាក់ស្លាកលេ​ខភ្នំពេញ:1KK-4037 ជិះគ្នា០២នាក់ បណ្ដាលឲ្យភាគីអ្នកជិះម៉ូតូ scopy-I របួសធ្ងន់ម្នាក់ រួចបក្ខពួកខាងម៉ូតូឌ្រីមសង់មកដល់ក៏ទា​ញដំបងមែកស្រ​ល់ដេ​ញវាយទៅលើភាគីខាងម៉ូតូ scopy-I និងបក្ខពួក​នៅ​កន្លែងកើត​ហេតុ។

ក្រោយកើតហេតុកម្លាំងនគរបាលនៃអធិការដ្ឋាននគរបាល​ស្រុក​ភ្នំស្រួច​ បានស្ទា​ក់ឃាត់បាន​ជនសង្ស័យបានចំនួន៣នាក់​ឈ្មោះ សេង រ៉ាវ័ន្ត​ ឈ្មោះ គង់ ណាវី និងឈ្មោះ សេង ពន្លឺ ភេទប្រុស អាយុ១៨ឆ្នាំ រស់នៅភូមិតា​យស់ ឃុំជើងរាស់ ស្រុកសាមគ្គីមុនីជ័យ។ ចំណែកឈ្មោះ សេ​ង ដារ៉ា កំពុងរត់គេចខ្លួន រីឯភាគីម្ខាងទៀតឈ្មោះ រី សុគន្ធ របួសធ្ងន់ដោយសារគ្រោះថ្នាក់ចរាចរណ៍កំពុងសំរាក​ព្យាបាលនៅមន្ទីរ​ពេទ្យផ្សារត្រែងត្រយឹង។​

ក្នុងករណីនេះសមត្ថកិច្ច​ដកហូតម៉ូតូចំនួន៣គ្រឿង ១-គ្រឿងម៉ាកscopy-i ពណ៌ក្រហម គ្មានផ្លាកលេខ សេរីឆ្នាំ២០២២។ ២-ម៉ាកសងC125 សេរីឆ្នាំ២០២៤ ពណ៌ក្រហម ពាក់ផ្លាកលេខ ភ្នំពេញ:1KK-4037។ ៣-ម៉ាកសងC125 សេរីឆ្នាំ២០២២ ពណ៌ស ពាក់ផ្លាកលេខ ភ្នំពេញ:1JA-7814។ ជនស​ង្ស័យដែលឃាត់ខ្លួនត្រូវបានបញជូនទៅអធិការដ្ឋាននគរបាលស្រុកភ្នំស្រួច​ ដើម្បីកសាងសំណុំរឿងចាត់ការតាមនីតិវិធី។

សូមបញ្ចាក់ថា ករណីគ្រោះថ្នាក់ចរាចរណ៍បង្កជាហិង្សានេះ បានកើតឡើងកាលពីវេលាម៉ោង១៤និង​២០នាទី រសៀលថ្ងៃទី១១ ខែកុម្ភៈ ឆ្នាំ២០២៤ នៅលើឧទ្យាន​ជាតិគីរីរម្យ ចំណុចជិតរង្វង់មូលនាគព័ន្ធ ក្នុងមូលដ្ឋានស្រុកភ្នំស្រួច​ ខេត្តកំពង់ស្ពឺ ហើយត្រូវបានអ្នកលេងបណ្ដាលសង្គមថតបានពីសកម្មភាពក្រុមក្មេងទាំងនោះកាន់ដំបងដេញវាយគ្នា និងបានចែករំលែកតៗគ្នាថា ជាករណីក្មេងទំនើញដេញកាប់គ្នាបណ្ដាលឲ្យមានអ្នកស្លាប់៕

អត្ថបទ៖ សុខុម