ក្នុងមួយយប់ សមត្ថកិច្ចឃាត់បានយានយន្តល្មើសជាតិស្រវឹងជាង ៧០គ្រឿង

នៅយប់ថ្ងៃទី២៣ ខែមេសា ឆ្នាំ២០២៤ តាមបណ្តាអធិការដ្ឋាននគរបាលខណ្ឌ បានចុះអនុវត្តរឹត​បន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល ឃាត់បានយានយន្តល្មើស ចំនួន៨៤គ្រឿង (រថយន្ត ៤១គ្រឿង, ម៉ូតូ ៤៣គ្រឿង) ដោយក្នុងនោះមានយានយន្តចំនួន ៧៣គ្រឿង ល្មើសជាតិស្រវឹង។ នេះបើតាមការផ្សព្វផ្សាយរបស់ស្នងការដ្ឋាននគរបាលរាជធានីភ្នំពេញ ថ្ងៃទី២៤ ខែមេសា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពដដែលបង្ហាញថា យានយន្ត៧៣គ្រឿងដែល្មើសជាតិស្រវឹងមានដូចជា ល្មើសកម្រិត ០.២៥-០.៣៩ mg/L ចំនួន៣០គ្រឿង ដោយមានអ្នកបើកបរម៉ូតូ ចំនួន១២នាក់ និងអ្នកបើកបររថយន្ត ចំនួន១៨នាក់។ ចំណែកល្មើសក្នុងកម្រិត ០.៤០ mg/L ឡើង ចំនួន៤៣ គ្រឿង ក្នុងនោះមានអ្នកបើកបរម៉ូតូ ចំនួន២៥ នាក់ និងអ្នកបើកបររថយន្ត ចំនួន១៨នាក់។

ក្រៅពីបទល្មើសជាតិស្រវឹង មានយានយន្តដែលមានបទល្មើសផ្សេងៗ ចំនួន១១គ្រឿង ក្នុងនោះអ្នកបើកបរមិនពាក់មួកសុវត្ថិភាព ៦នាក់ រថយន្តអត់បណ្ណបើកបរ ចំនួន ៣គ្រឿង ប័ណ្ណបើកបរហួសសុពលភាព ចំនួន០១គ្រឿង និងខុសប័ណ្ណបើកបរ ចំនួន០១គ្រឿង។ ជាមួយនឹងការឃាត់យានយន្តនេះ ក៏មានវិធានការអប់រំអ្នកបើកបរចំនួន៧៥នាក់ផងដែរ ដោយអប់រំអ្នកបើកបរមានអាល់កុលក្រោម ០.២៥ mg/L ចំនួន៣២នាក់ អប់រំអ្នកបើកបររថយន្ត ចំនួន២២នាក់ អប់រំអ្នកបើកបរម៉ូតូ ចំនួន១០នាក់ និងអប់រំអ្នកបើកបរមិនពាក់មួកសុវត្ថិភាព ចំនួន៤៣នាក់៕