បង្ក្រាបបទល្មើសនេសាទខុសច្បាប់ ដកហូតទូកកាណូត៤គ្រឿង និងឧបករណ៍មួយចំនួន

កាណូតស្មាច់ដែលជាយានល្មើសច្បាប់ចំនួន៤គ្រឿង និងឧបករណ៍នេសាទខុសច្បាប់៦ឈុតរួមជាមួយនឹងត្រីជាច្រើនគីឡូផងនោះ ត្រូវបានសមត្ថកិច្ចបង្ក្រាប និងដកហូតបាន ដោយឡែកជនបង្កគេចខ្លួនបាត់អស់។

កិច្ចប្រតិបត្តិការរបស់សមត្ថកិច្ចជំនាញនេះបានធ្វើឡើងក្នុងភូមិសាស្ត្រ ឃុំកោះជីវាំង ស្រុកឯកភ្នំ ខេត្តបាត់ដំបង នេះបើតាមរបាយការណ៍របស់សមត្ថកិច្ច នាថ្ងៃទី២៣ ខែមេសា ឆ្នាំ២០២៤។

របាយការណ៍របស់សមត្ថកិច្ចបានបញ្ជាក់ថា កម្លាំងប៉ុស្តិ៍រដ្ឋបាលឃុំកោះជីវាំង និងកម្លាំងសង្កាត់កំពង់ប្រហុក បានចុះប្រតិបត្តិការនាព្រឹកថ្ងៃទី២២ ខែមេសា នៅចំណុចក្រឡុកសារ៉ាយ ក៏ប្រទះឃើញជនសង្ស័យមួយក្រុមកំពុងប្រព្រឹត្តបទល្មើសនេសាទខុសច្បាប់ពេលដែលជនសង្ស័យទាំងនេះក្រឡេកឃើញសមត្ថកិច្ចក៏នាំគ្នារត់គេចខ្លួនបាត់អស់នៅសល់តែវត្ថុតាងនៅនឹងកន្លែង។

សមត្ថកិច្ចបញ្ជាក់ថា វត្ថុតាងដែលដកហូតបាននោះរួមមាន កាណូតស្មាច់មានបំពាក់ម៉ាស៊ីន ៤ គ្រឿង ដុំអាំងវ៉ិចទ័រ ៦ គ្រឿង អាគុយ៤០អំពែរ ៦គ្រឿង ដងឆក់ ៦គូ និងត្រីចំនួន ៣០គីឡូក្រាម។

បច្ចុប្បន្ននេះវត្ថុតាងទាំងអស់សមត្ថកិច្ចបានរក្សាទុកនៅសង្កាត់ជលផលកំពង់ប្រហុក ដើម្បីចាត់ការតាមនីតិវិធីច្បាប់ ដោយកំបាំងមុខពីជនល្មើស៕

អត្ថបទ៖ សោ និយមរ័ត្ន