ព័ត៌មានជាតិ

ខណ្ឌរដ្ឋបាលជលផលកំពង់ចាម ចុះបង្ក្រាបបទល្មើសជលផល នៅភូមិសាស្ត្របឹងជ្រោយ

បានផុស

៨ ខែ មុន

នៅ

ថ្ងៃចន្ទ ២៧ តុលា ២០២៥

ដោយ

មន្ត្រីជំនាញ នៃខណ្ឌរដ្ឋបាលជលផលកំពង់ចាម បានចុះទប់ស្កាត់ និងបង្ក្រាបបទល្មើសជលផលនៅភូមិសាស្ត្រចំណុចកំពង់ទូកបឹងជ្រោយ ស្រុកជើងព្រៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្លាំងជំនាញ នៃខណ្ឌរដ្ឋបាលជលផលកំពង់ចាម សហការជាមួយអធិការដ្ឋានរដ្ឋបាលជលផលមេគង្គ បានចុះប្រតិបត្តិការបង្ក្រាបបទល្មើសជលផលនៅចំណុចកំពង់ទូកបឹងជ្រោយ ភូមិបឹងជ្រោយ ឃុំសូទិព្វ ស្រុកជើងព្រៃ ខេត្តកំពង់ចាម ក្រោយពីមានការផ្សព្វផ្សាយថា «បទល្មើសនេសាទកាន់តែគគ្រឹកគគ្រេងនៅក្នុងបឹងជ្រោយ ខណៈមានមេឈ្មួញដ៏ធំចាំប្រមូលទិញកូនត្រីយកធ្វើត្រីនុយឲ្យត្រីចិញ្ចឹមស៊ីក្នុងមួយថ្ងៃៗ រាប់តោនចឹងសោះ»។

ក្រោយពីមន្ត្រីជំនាញចុះពិនិត្យ និងបង្ក្រាបបទល្មើសនេសាទនៅតំបន់បឹងជ្រោយ ជាលទ្ធផលឃើញថា តំបន់នោះសម្បូរការនេសាទជាលក្ខណៈទ្រង់ទ្រាយតូចៗ ហើយក៏គ្មានឈ្មួញធំៗ ចុះចាំទិញកូនត្រីយកធ្វើត្រីនុយដែរ គឺមានតែអាជីវករក្នុងស្រុកមករង់ចាំទិញយកទៅលក់នៅតាមទីផ្សារ ឬយកទៅធ្វើប្រហុក ផ្អក មុំា ទឹកត្រី សម្រាប់ដោះស្រាយជីវភាពនៅក្នុងរដូវប្រាំង។

មន្ត្រីជំនាញ នៃខណ្ឌរដ្ឋបាលជលផលកំពង់ចាម បញ្ជាក់ថា ប្រភេទឧបករណ៍នេសាទដែលប្រជានេសាទធ្វើអាជីវកម្មតាមទម្លាប់របស់ពួកគាត់រួមមាន ៖ មង សន្ទូច ថ្នង លប រ៉ាវ សំណាញ់ និងឧបករណ៍ស្របច្បាប់ផ្សេងៗ ទៀត។ ចំណែកឧបករណ៍ល្មើសច្បាប់ដូចជា ស្បៃមុង របាំង ផ្ចិតព្រែក ឧបករណ៍ឆក់ត្រីជាដើម ត្រូវបានសមត្ថកិច្ចរួមសហការជាមួយអាជ្ញាធរមូលដ្ឋាន ចុះទប់ស្កាត់ និងបង្ក្រាបជាប្រចាំ ប៉ុន្តែទោះជាយ៉ាងណាក៏នៅតែមានជនខិលខូចលបលួចប្រព្រឹត្ត ជាពិសេសនៅតំបន់ឆ្ងាយៗ ដែលសមត្ថកិច្ចពិបាកទៅដល់៕

អត្ថបទ និង រូបភាព ៖ ឡេក ចាន់ពេជ្រ