កោះហៅមន្ត្រីព្រហ្មទណ្ឌម្នាក់មកសួរនាំ ពាក់ព័ន្ធ​ជនស៊ីវិលឃាត់មនុស្សនៅខណ្ឌសែនសុខ

ក្រោយមានការចែកចាយតាមបណ្ដាញសង្គមពាក់ព័ន្ធការឃាត់ខ្លួនមនុស្សមួយក្រុមដោយជនស៊ីវិលកាលពីយប់ថ្ងៃទី១៧កក្កដា នៅព្រឹកថ្ងៃទី១៨កក្កដានេះ កម្លាំងនាយកដ្ឋាននគរបាលព្រហ្មទណ្ឌ បានកោះហៅមន្ត្រីនគរបាលព្រហ្មទណ្ឌម្នាក់មកសួរនាំ។

បើតាមនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្នុងចំណោមជនស៉ីវិលទាំងនោះមានម្នាក់ ជាមន្ដ្រីនគរបាលរបស់នាយកដ្ឋាននគរបាលព្រហ្មទណ្ឌ (មិនមានក្នុងរូប) ដែលនៅពេលនេះនាយកដ្ឋានកំពុងធ្វើការសួរនាំតាមនីតិវិធីជំនាញ។ ប៉ុន្ដែមនុស្ស២នាក់ផ្សេងទៀត ដែលពាក់កាតមានសញ្ញានគរបាលព្រហ្មទណ្ឌ មិនមែនជាមន្ដ្រីនគរបាលបម្រើការងារនៅនាយកដ្ឋានឡើយ។

ប៉ុន្ដែទោះជាយ៉ាងណា ករណីនេះនាយកដ្ឋាននគរបាលព្រហ្មទណ្ឌ កំពុងបន្ដស្រាវជ្រាវយ៉ាងយកចិត្តទុកដាក់ និងស្វែករកអ្នកពាក់ព័ន្ធ ព្រមទាំងដើមចមនៃហេតុការណ៍នេះ។ នាយកដ្ឋាននគរបាលព្រហ្មទណ្ឌ សូមថ្លែងអំណរគុណចំពោះការផ្ដល់ព័ត៌មានពីសាធារណៈ និងអ្នកសារព័ត៌មានទាំងអស់។

គួរបញ្ជាក់ថា កាលពីយប់ថ្ងៃទី១៧ ខែកក្កដា ឆ្នាំ២០២៤ មានករណីជនស្លៀកស៉ីវិលមួយក្រុម (២នាក់ពាក់កាតមានសញ្ញានគរបាលព្រហ្មទណ្ឌ) បានឃាត់មនុស្សមួយក្រុម នៅតាមបណ្ដោយផ្លូវសហព័ន្ធរុស្ស៉ី ស្ថិតក្នុងខណ្ឌសែនសុខ រាជធានីភ្នំពេញ។

អត្ថបទ៖ សុភា