ស្នងការរាជធានីបញ្ជូនមន្ត្រីយោធាម្នាក់ទៅតុលាការ ពាក់ព័ន្ធបណ្ដឹងរបស់នារីម្នាក់ពីបទរំលោភសេពសន្ថវៈ

កម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ កាលពីព្រឹកថ្ងៃទី៤សីហា ឆ្នាំ២០២៤ បានបញ្ជូនមន្ត្រីយោធាម្នាក់ទៅសាលាដំបូងរាជធានីភ្នំពេញ ដើម្បីអនុវត្តនីតិវិធីច្បាប់ តាមពាក្យបណ្ដឹងរបស់នារីម្នាក់ដែលប្ដឹងពីបទចាប់រំលោភសេពសន្ថវៈ។ នេះបើតាមការឲ្យដឹងពីលោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ ប្រាប់ កម្ពុជាថ្មី កាលពីរសៀលថ្ងៃទី៤សីហា ម្សិលមិញនេះ។

លោកវរសេនីយ៍ឯក សំ វិច្ឆិកា បន្ថែមថា ករណីនេះកម្លាំងជំនាញបានអនុវត្តតាមបណ្ដឹងរបស់ជនរងគ្រោះ ដែលប្ដឹង​ចោទ​លើជនសង្ស័យ ខណៈជនសង្ស័យឆ្លើយថា ខ្លួនមិនបានប្រព្រឹត្តដូចការចោទប្រកាន់របស់នារីរងគ្រោះនោះទេ គឺជារឿងត្រូវរ៉ូវគ្នា។​ អ្នកនាំពាក្យស្នងការនគរបាលរាជធានីភ្នំពេញបញ្ជាក់ថា ករណីនេះជនស្ស័យបានចូលមកសារភាពនៅអធិការដ្ឋានខណ្ឌជ្រោយចង្វារ ក្រោយកើតហេតុភ្លាមៗ ហើយក៏ត្រូវបានឃាត់ខ្លួនបញ្ជូនមកការិយាល័យព្រហ្មទណ្ឌកម្រិតសា្រល និងកសាងសំណុំរឿងបញ្ជូនតែម្ដង។

សូមជម្រាបថា កាលពីយប់ថ្ងៃទី១ ខែសីហា ឆ្នាំ២០២៤ នារីរងគ្រោះបានទៅដាក់ពាក្យបណ្ដឹងនៅអធិការដ្ឋាននគរបាលខណ្ឌជ្រោយចង្វារ ប្ដឹងចោទលើជនសង្ស័យឈ្មោះ កែវ សកល ហៅ ទី ភេទប្រុស មុខរបរ យោធា ឋាន្តរសក្តិ វរសេនីយ៍ឯក ពីបទចាប់រំលោភសេពសន្ថវៈ នៅចំណុចផ្លូវ បេតុង ocic ភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ។ បន្ទាប់ពីទទួលបានពាក្យបណ្តឹងពីជនរងគ្រោះកម្លាំងអធិការដ្ឋាននគរបាលខណ្ឌជ្រោយចង្វារ បានឃាត់ខ្លួនជនសង្ស័យបាននៅថ្ងៃទី២សីហា និងបានបញ្ជូនមកការិយាល័យព្រហ្មទណ្ឌកម្រិតស្រាលដើម្បីអនុវត្តបន្ត៕

អត្ថបទ៖ សុខុម