សន្តិសុខសង្គម

នគរបាលឃាត់ខ្លួនបុរស ២ នាក់ ដើរយកលុយពីពលរដ្ឋលក់ដូរ តាមកញ្ច្រែង កញ្ជើ ល្អី

បានផុស

១ ខែ មុន

នៅ

ថ្ងៃចន្ទ ១២ សីហា ២០២៤

ដោយ

នគរបាលព្រហ្មទណ្ឌខណ្ឌពោធិ៍សែនជ័យ ធ្វើការឃាត់ខ្លួនបុរស ២ នាក់ ដើរទារលុយពីអ្នកលក់ដូរតាមកញ្ច្រែង កញ្ជើ ល្អី បំពានសារាចរណែនាំរបស់រាជរដ្ឋាភិបាល និង សេចក្ដីណែនាំរដ្ឋបាលរាជធានីភ្នំពេញ ដែលបានដាក់ចេញកន្លងមក ដើម្បីកាត់បន្ថយការលំបាកខ្វះខាតរបស់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសដែលត្រូវនគរបាលឃាត់ខ្លួននោះ ទី១.ឈ្មោះ ថៃ ឈឿន អាយុ ៤០ ឆ្នាំ មុខរបរបើកបររថយន្ត មានទីលំនៅផ្ទះលេខ ១៤ សង្កាត់បឹងព្រលឹត ខណ្ឌ ៧ មករា រាជធានីភ្នំពេញ។ និង ទី២.ឈ្មោះ ចាន់ ម៉េន អាយុ ៤៥ ឆ្នាំ មុខរបរសន្តិសុខ មានទីលំនៅសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។

អាជ្ញាធរបានឲ្យដឹងថា បុរសទាំង ២ នាក់ នេះ បានធ្វើសកម្មភាពដើរប្រមូលទារលុយពីប្រជាពលរដ្ឋដែលរកស៊ីលក់ដូរ បន្លែ និងរបស់របរតាមកញ្ច្រែង កញ្ជើ ល្អី ជាច្រើនកន្លែង ស្ថិតនៅខាងក្រោយសួនកុមារពោធិចិនតុង ភូមិតាងួន ១ សង្កាត់កាកាប ១ ខណ្ឌពោធិ៍សែនជ័យ ដោយក្នុងមួយកន្លែងៗ ចាប់ពី ៥ ពាន់ ទៅ ១ ម៉ឺនរៀល។ បញ្ហានេះបានបំពានសារាចរណែនាំ «លេខ ១១ សរ» របស់រាជរដ្ឋាភិបាល ដែលបានដាក់ចេញកាលពីឆ្នាំ ២០១៦ ស្ដីពីការលុបការបង់ថ្លៃចំពោះប្រជាពលរដ្ឋលក់ដូរតាមកញ្ច្រែង កញ្ជើ ល្អី។

ក្រោយពេលចាប់ខ្លួន បុរសទាំង ២ នាក់ នេះ បានសារភាពថា ពួកខ្លួនពិតជាបានដើរប្រមូលលុយពីអ្នកលក់ដូរមែន ដោយកាលពីថ្ងៃទី ១០ ខែសីហា ឆ្នាំ ២០២៤ ឈ្មោះ កែវ វ៉ា ភេទប្រុស អាយុ ៤៦ ឆ្នាំ មុខរបរជាមន្ត្រីរាជការ បានឲ្យពួកខ្លួនយាមការដ្ឋានសំណង់។ បន្ទាប់មក ឈ្មោះ កែវ វ៉ា នោះ បានប្រើឲ្យពួកខ្លួនទារភាស៊ីពីអ្នកលក់នៅក្បាលដីរបស់ ឈ្មោះ កែវ វ៉ា មួយកន្លែង ៥ ពាន់ ទៅ ១ ម៉ឺនរៀល។ លុះពេលទារលុយបាន ពួកខ្លួនយកលុយនោះទៅប្រគល់ឲ្យឈ្មោះ កែវ វ៉ា ជាអ្នកចាត់ចែង ហើយរហូតដល់ថ្ងៃទី ១១ ខែសីហា ឆ្នាំ ២០២៤ ស្រាប់តែសមត្ថកិច្ចចុះឃាត់ខ្លួនតែម្ដង។

អាជ្ញាធរសង្កត់ធ្ងន់ថា ដោយអនុវត្តតាមការណែនាំរបស់រាជរដ្ឋាភិបាល រដ្ឋបាលរាជធានីភ្នំពេញ ក៏បានចេញសេចក្ដីណែនាំមួយផងដែរ ស្ដីពីការមិនប្រមូលចំណូលភាស៊ី និងការបង់ថ្លៃផ្សេងៗ ចំពោះការលក់ដូរតាមកញ្ច្រែង កញ្ជើ ល្អី និងការលក់ដូរចល័តគ្រប់ប្រភេទនៅរាជធានីភ្នំពេញ។ ក្នុងនោះ ដោយបានផ្សព្វផ្សាយយ៉ាងទូលំទូលាយរួចមកហើយ ប៉ុន្តែបុរសទាំង ២ នាក់ នេះ នៅតែបំពាន ឆ្លៀតឱកាស ទើបកម្លាំងអាជ្ញាធរ និងនគរបាលព្រហ្មទណ្ឌខណ្ឌពោធិ៍សែនជ័យ ធ្វើការឃាត់ខ្លួន ដើម្បីសាកសួរ និងចាត់ការតាមច្បាប់៕

អត្ថបទ ៖ សុភា