អាជ្ញាធរសង្កាត់ចោមចៅទី៣ សហការជាមួយមន្ទីរសាធារណការរាជធានី​ ចុះស្តារប្រព័ន្ធលូ​ក្នុងភូមិអូឌឹម

លោក​ វ៉ា​ សាវឿន​ ចៅសង្កាត់ចោមចៅទី៣ នៃរដ្ឋបាលខណ្ឌពោធិ៍សែនជ័យ នៅរសៀលថ្ងៃទី៣០​ ខែ​សីហា​ ឆ្នាំ២០២៤​នេះ​ បានសហការជាមួយក្រុមការងាររថយន្តបូមលូរបស់រដ្ឋបាលរាជធានីភ្នំពេញ​ ចុះបូម និងស្តារកាកសំណល់ចេញពីប្រព័ន្ធលូ ដើម្បីបញ្ចៀសការកកស្ទះចរន្ដទឹក។ ការចុះបូម និងស្ដារប្រព័ន្ធលូនេះ ធ្វើឡើងបន្ទាប់ពីមានការរាយការណ៍ពីប្រជាពលរដ្ឋក្នុងមូលដ្ឋាន ក្នុងភូមិអូឌឹម សង្កាត់ចោមចៅទី៣​ ពីផលប៉ះបាល់នៃការកកស្ទះចរន្ដទឹកហូរ។

លោក​ វ៉ា​ សាវឿន​ តំណាងឱ្យរដ្ឋបាលសង្កាត់ចោមចៅទី៣ទាំងមូល​ ក៏បានថ្លែងអំណរគុណដល់លោក​ សាំ​ ពិសិដ្ឋ​ ប្រធានមន្ទីរសាធារណការនិងដឹងជញ្ជូនរាជធានីភ្នំពេញ​ រួមទាំងក្រុមការងារ​ ដែលបានផ្តល់រថយន្តសម្រាប់បូមលូដោះស្រាយបញ្ហាជូនប្រជាពលរដ្ឋទាន់ពេលវេលា។

លោកចៅសង្កាត់​ ក៏បានសំណូមពរដល់ប្រជាពលរដ្ឋទាំងអស់មេត្តាវិចខ្ចប់​ និងទុកដាក់​សំរាមក្នុងធុងសំរាមឱ្យបានត្រឹមត្រូវដើម្បីរង់ចាំក្រុមហ៊ុនមកប្រមូល​ ជៀសវាងបោះចោល​អាចហេីររឺធ្លាក់ចូលប្រព័ន្ធលូ​ បង្កឱ្យស្ទះនូវចរន្តទឹក៕

អត្ថបទ៖ សុខា