សមត្ថកិច្ចសម្រេចឃាត់ខ្លួនជនសង្ស័យ កាម៉ារូទីន ស៊ូហៃមី ពាក់ព័ន្ធករណីរំលោភសិស្សសាលាខ្មែរឥស្លាមច្រើននាក់

ជនសង្ស័យឈ្មោះ កាម៉ារូទីន ស៊ូហៃមី ដែលរងការចោទប្រកាន់ពាក់ព័ន្ធករណីរំលោភបំពានលើសិស្សសាលាខ្មែរឥស្លាម ត្រូវបានព្រះរាជអាជ្ញាតំណាងឲ្យនាយកដ្ឋានប្រឆាំងការជួញដូរមនុស្ស និងការពារអនីតិជន បញ្ជាឲ្យសមត្ថកិច្ចឃាត់ខ្លួន និងបញ្ជូនសំណុំរឿងទៅតុលាការ។ ការឃាត់ខ្លួននេះបានធ្វើឡើងបន្ទាប់ពីនាយកដ្ឋានប្រឆាំងការជួញដូរមនុស្ស និងការពារអនីតិជន បាននាំខ្លួនជនសង្ស័យមកសួរនាំកាលពីថ្ងៃទី១៥តុលាម្សិលមិញ។

សូមបញ្ជាក់ថា តាមការស្រាវជ្រាវរបស់នាយកដ្ឋានប្រឆាំងការជួញដូរមនុស្ស និងការពារអនីតិជន បានរកឃើញកុមារីសិស្សសាលាខ្មែឥស្លាមរងគ្រោះចំនួន៤នាក់ ក្នុងនោះមានអាយុ១៣ឆ្នាំមួយនាក់ អាយុ១៤ឆ្នាំមួយនាក់ និងអាយុ១៥ឆ្នាំពីរនាក់ ត្រូវបានជនសង្ស័យប្រព្រឹត្តបទល្មើសប្រទូស្តកេរិ៍ និងរំលោភសេពសន្ថវ:។ បើតាមនាយកដ្ឋាន ក្នុងចំណោមជនរងគ្រោះទាំង៤ មានពីរនាក់បានមកដាក់ពាក្យបណ្ដឹង និងពីរនាក់ទៀតមិនដាក់បណ្តឹង ហើយក៏មានសាក្សី៤នាក់ផ្សេងទៀតបានបំភ្លឺផ្តល់ព័ត៌មានដែរ។

នាយកដ្ឋានបញ្ជាក់ថា ជនសង្ស័យឈ្មោះ កាម៉ារូទីន ស៊ូហៃមី ភេទប្រុស មានអាយុ៣៣ឆ្នាំ មុខរបរនាយកគ្រប់គ្រងសាលាខ្មែរឥស្លាម។ ទោះបីមានសួរចម្លើយយ៉ាងណា ជនសង្ស័យនៅតែមិនព្រមឆ្លើយសារភាពនោះទេ ពោលគឺគេចវេសពីការទទួលខុសត្រូវ ទោះបីមានសាក្សីមកបំភ្លឺក្ដី៕

អត្ថបទ៖ សំណាង