ចិញ្ចើមមហាវិថីព្រះសីហនុ សម្រេចគម្រោងផ្លាស់ប្តូរការ៉ូឡាថ្មីបានជាង៥០០ម៉ែត្រ

សោភណ្ឌភាពដងផ្លូវបណ្តោយមហាវិថីព្រះសីហនុ នឹងមានសភាពស្រស់ស្អាតប្រសើរជាមុន ក្រោយអាជ្ញាធរយកចិត្តទុកដាក់លើការផ្លាស់ប្តូរការ៉ូឡាថ្មីឡើងវិញ។

សូមបញ្ជាក់ថា បណ្ដោយមហាវិថីព្រះសីហនុ ចាប់ពីចំណុចស្តុប ៤២ជាន់ ទៅដល់ស្តុបអាងទឹក មានប្រវែង១៨០០ម៉ែត្រ ដែលស្ថិតនៅក្នុងមូលដ្ឋានខណ្ឌបឹងកេងកង រាជធានីភ្នំពេញ មន្ត្រីជំនាញកំពុងធ្វើការជួលជុលផ្លាស់ប្តូរការ៉ូឡាថ្មី ដើម្បីបន្ថែមសោភណ្ឌភាពតាមដងផ្លូវ។

លោក សុខ សម្បត្តិ អភិបាលខណ្ឌបឹងកេងកង បានប្រាប់អោយដឹងថា ដោយឃើញការ៉ូឡាចាស់នៅតាមបណ្តោយ​មហាវិថីព្រះសីហនុ ចំណុចស្តុប ៤២ជាន់ រហូតទៅដល់ស្តុបអាងទឹក មានការខូចខាតស្ទើរទាំងស្រុងទៅហើយ រួមជាមួយនឹងពលរដ្ឋមួយចំនួនមិនបានយល់ដឹងអំពីសោភណ្ឌភាពដងផ្លូវផង ទើបរដ្ឋបាលខណ្ឌបឹងកេងកង អោយមន្រ្តីជំនាញពាក់ព័ន្ធលើរឿងនេះ ចុះមកត្រួតពិនិត្យជួសជុលឡើងវិញ និងអប់រំណែនាំអោយពលរដ្ឋយល់ដឹងអំពីសម្រស់តាមដងផ្លូវ ដើម្បីអោយមានភាពល្អប្រសើរជាងមុនផងដែរ។

លោកអភិបាលបន្តថា ចំពោះការផ្លាស់ប្តូរនេះ គឺមានប្រវែង១៨០០ម៉ែត្រ ដែលគិតត្រឹមថ្ងៃទី២៣ ខែតុលា ឆ្នាំ២០២៤នេះ សម្រេចជាង៥០០ម៉ែត្រ ស្មើនឹង ២៥ភាគរយ នៃគម្រោងផ្លាស់ប្តូរការ៉ូឡាថ្មីនេះ។

ជាមួយគ្នានេះ រដ្ឋបាលខណ្ឌបឹងកេងកង សំណូមពរដល់ប្រជាពលរដ្ឋមេត្តាជួយថែរក្សាអនាម័យ ទុកដាក់សំរាមអោយមានរបៀប និងជួយយោគយល់ចំពោះការដ្ឋាននៃគម្រោងបានអនុវត្តន៍នាពេលនេះ៕

អត្ថបទ៖ រដ្ឋា