Update៖ អ្នកកាសែតដែលត្រូវខ្មាន់កាំភ្លើងបាញ់ប្រហារនៅស្រុកជីក្រែង បានបាត់បង់ជីវិតហើយ ក្រោយបញ្ជូនដល់មន្ទីរពេទ្យជាង១ថ្ងៃ

អ្នកកាសែតម្នាក់ដែលរបួសដោយការបាញ់ប្រហាររបស់ឈ្មួញឈើនៅស្រុកជីក្រែង បានបាត់បង់ហើយ ក្រោយបញ្ជូនដល់មន្ទីរពេទ្យជាង១ថ្ងៃ។ ចំពោះជនជាប់ចោទអាចនឹងត្រូវជាប់ទោសកាន់តែច្រើនឆ្នាំទៀត(បទ ឃាតកម្មគិតទុកជាមុន)។

សមត្ថកិច្ចបានឲ្យដឹងថា នៅថ្ងៃទី៤ ខែធ្នូ ឆ្នាំ២០២៤ វេលាម៉ោង១៨និង០០នាទី មានករណីប៉ុនប៉ងឃាតកម្ម ( បាញ់ដោយអាវុធកែច្នៃ) នៅត្រង់ចំណុចដីចម្ការត្រពាំងរាំង ស្ថិតក្នុងភូមិត្រពាំងភ្លោះ ឃុំពង្រលើ ស្រុកជីក្រែង ខេត្តសៀមរាប ដែលបង្កឡើងដោយជនជាប់ចោទ ឈ្មោះ ស៊ី លឿយ ភេទប្រុស អាយុ៤០ឆ្នាំ មុខរបរកសិករ បណ្តាលឲ្យរងបួសធ្ងន់ ហើយបានស្លាប់ ក្រោយបញ្ជូនដល់មន្ទីរពេទ្យជាង១ថ្ងៃ ព្រោះរបួសធ្ងន់ពេក គ្រូពេទ្យវះកាត់យកក្បាលគ្រាប់រួចក៏ស្លាប់យ៉ាងអណោចអធ័ម។

បច្ចុប្បន្នសពជនរងគ្រោះត្រូវបានគ្រួសារបញ្ជូនទៅធ្វើបុណ្យតាមប្រពៃណីនៅផ្ទះរបស់គាត់ ស្ថិតក្នុងភូមិអញ្ចាញ សង្កាត់នគរធំ ក្រុងសៀមរាប។ រីឯជនដល់ដៃដល់ខាងលើ ត្រូវបានកម្លាំងនគរបាលខេត្តសៀមរាប បញ្ជូនទៅតុលាការហើយកាលពីរសៀលថ្ងៃទី០៦ ខែធ្នូ ឆ្នាំ២០២៤ និងត្រូវចៅក្រមស៊ើបសួរ ឃី ឆៃ បានសម្រេចឃុំខ្លួនជនចាប់ចោទទៅពន្ធនាគារជាបណ្តោះអាសន្ន៕

អត្ថបទ៖ ជុន កុសល