រដ្ឋបាលខណ្ឌឫស្សីកែវ ដាក់គ្រឿងចក្រជួសជុលប្រព័ន្ធលូមួយកន្លែងបន្ទាប់ពីស្ទះចរន្ដទឹកហៀរចេញលើដងផ្លូវ

រដ្ឋបាលខណ្ឌឬស្សីកែវ ដាក់គ្រឿងចក្រជួសជុលស្ដារប្រព័ន្ធលូមួយកន្លែងនៅលើផ្លូវ១៣០០ ត្រង់ចំណុចភូមិឡកំបោ សង្កាត់ស្វាយប៉ាក ដើម្បីរំដោះទឹកដក់នៅលើដងផ្លូវ ខណៈប្រព័ន្ធលូចាស់បាក់បែកទ្រុឌទ្រោមធ្វើឱ្យស្ទះចរន្ដទឹកហៀរចេញក្រៅជះក្លិនស្អុយដល់ពលរដ្ឋ។

បើតាមការបញ្ជាក់ពីលោក ជិន ប៊ុនធឿន អភិបាលខណ្ឌឫស្សីកែវ បានលើកឡើងថា នៅត្រង់ចំណុចនេះតែងមានទឹកហូរកាត់ផ្លូវ មានក្លិនស្អុយ ដោយផ្នែកមួយចំនួនដុះស្លែធ្វើឲ្យប្រជាពលរដ្ឋពិបាកក្នុងការធ្វើដំណើរ និងបង្កគ្រោះថ្នាក់ជាយថាហេតុ។ បន្ទាប់ពីឃើញបែបនេះ លោកបានចាត់អោយមន្រី្តជំនាញយកគ្រឿងកាយរំដោះទឹកនៅលើផ្លូវ និងបាញ់លាងសម្អាត លែងឲ្យមានទឹកហូរកាត់ផ្លូវនេះបន្តទៀត។ លោកបញ្ជាក់ថា ពីនេះទៅទៀតរដ្ឋបាលខណ្ឌប្ញស្សីកែវ នឹងរៀបចំដាក់លូរំដោះទឹកតាមគម្រោងផែនការប្រចាំឆ្នាំរបស់រដ្ឋបាលខណ្ឌនាពេលខាងមុខនេះដែរ។

ក្នុងឧកាសនោះលោកអភិបាលខណ្ឌ ក៏បានណែនាំដល់ប្រជាពលរដ្ឋ អាជីវករលក់ដូរតាមបណ្ដោយផ្លូវ១០០៣ទល់មុខក្រសួងរៀបចំដែនដីនគរូបនីយកម្ម និងសំណង់ អោយចូលរួមសហការគ្នាថែរក្សា និងធានាអោយបាននូវសណ្ដាប់ធ្នាប់ របៀបរៀបរយ អនាម័យទីសាធារណៈ អោយបានត្រឹមត្រូវ៕

អត្ថបទ៖ ម៉េង