សន្តិសុខសង្គម

រកឃើញសពឃាតកដៃឆៅសម្លាប់ស្ត្រីលក់ភេសជ្ជៈម្នាក់ នៅស្តុបណ័រប្រីដ ហើយ

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

ឃាតកដែលយកដែកថ្នាំងអំពៅសម្លាប់ស្ត្រីលក់ភេសជ្ជៈម្នាក់ នៅស្តុបណ័រប្រីដ កាលពីថ្ងៃទី ២៤ ធ្នូ ថ្មីៗ នេះ ហើយជិះម៉ូតូចេញពីចំណុចកើតហេតុ សំដៅទៅស្ពានជ្រោយចង្វារ លោតទឹកសម្លាប់ខ្លួន នោះ ពេលនេះរកឃើញសពហើយ បន្ទាប់ពីសន្តិសុខឃើញអណ្ដែតក្រោយសណ្ឋាគារកាំបូឌីយ៉ាណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ០៨ ព្រឹក ថ្ងៃទី ២៦ ខែធ្នូ ឆ្នាំ ២០២៤ នៅចំណុចមាត់ច្រាំង ក្រោយសណ្ឋាគារកាំបូឌីយ៉ាណា សង្កាត់ចតុមុខ ខណ្ឌដូនពេញ រាជធានីភ្នំពេញ។

ចំពោះសពមានភិនភាគ សម្បុរពណ៌សណ្ដែកបាយ ពាក់អាវក្រៅក្រឡាការ៉ូ អាវក្នុងពាក់អាវយឺតដៃខ្លី ពណ៌ត្រអ៊ី និងស្លៀកខោខោវប៊យជើងវែង ពណ៌ខ្មៅ។

តាមប្រភពព័ត៌មានពីសន្តិសុខបានប្រាប់ឲ្យដឹងថា មុនកើតហេតុគាត់បានដើរមើលជុំវិញផែអូប័រ ដើម្បីសម្អាតកំប្លោក ស្រាប់តែប្រទះឃើញសពបុរសម្នាក់ បានអណ្ដែតផ្កាប់មុខនៅជាប់មាត់ច្រាំងទន្លេ ក្បែរនឹងផែអូប័ររបស់សណ្ឋាគារកាំបូឌីយ៉ាណាតែម្ដង។ ភ្លាមៗ គាត់ក៏ប្រញាប់រាយការណ៍ជូនសមត្ថកិច្ចចុះមកត្រួតពិនិត្យសាកសពខាងលើតែម្ដង។

សមត្ថកិច្ចបានបញ្ជាក់ថា ក្នុងការត្រួតពិនិត្យបានរកឃើញថា សពបុរសខាងលើ នៅផ្នែកដៃខាងឆ្វេងមានសាក់ឈ្មោះ អន លក្ខិណា ដែលដូចទៅនឹងពាក្យបណ្ដាំដែលបន្សល់ទុកនៅលើស្ពានជ្រោយចង្វារ។

ក្រោយកើតហេតុ សមត្ថកិច្ចជំនាញចក្ខុ និងកោសល្យវិច័យ នៃស្នងការដ្ឋាននគរបាលរាជធានីភ្នំពេញ បានចុះមកត្រួតពិនិត្យសព។ បន្ទាប់ពីត្រួតពិនិត្យ សមត្ថកិច្ចបានយកសពទៅតម្កល់នៅវត្តទឹកថ្លា រង់ចាំសាច់ញាតិក្រុមគ្រួសារយកទៅធ្វើបុណ្យតាមប្រពៃណី។

គួរបញ្ជាក់ថា កាលពីវេលាម៉ោង ០៥ និង ៥៧ នាទី ថ្ងៃទី ២៤ ខែធ្នូ ឆ្នាំ ២០២៤ ថ្មីៗ នេះ មានស្រ្តីជាអ្នកលក់ភេសជ្ជៈម្នាក់ បានអង្គុយនៅលើម៉ូតូរ៉ឺម៉ក ស្រាប់តែមានបុរសម្នាក់ជាឃាតកបានឈប់ម៉ូតូនៅផ្លូវម្ខាងទៀត រួចចុះពីលើម៉ូតូដោយដៃកាន់ថង់មួយ។ លុះដើរជិតដល់ស្ត្រីរងគ្រោះ ឃាតកបានដកដែកថ្នាំងអំពៅចេញពីថង់វាយសំពងយ៉ាងចាស់ដៃ ត្រូវក្បាលជនរងគ្រោះ បណ្ដាលឲ្យដាច់ផ្ងារធ្លាក់ពីលើម៉ូតូរ៉ឺម៉កស្លាប់។ ចំណែកបុរសជាឃាតកបានជិះម៉ូតូចាកចេញពីចំណុចកើតហេតុ សំដៅទៅកាន់ស្ពានជ្រោយចង្វារ ហើយបានទុករូបថត និងសំបុត្របណ្ដាំ ០១ សន្លឹក នៅលើស្ពាន រួចហក់សម្លាប់ខ្លួនតែម្ដង៕

អត្ថបទ ៖ រដ្ឋា