នគរបាលរាជធានីភ្នំពេញនឹងចុះពិនិត្យរកដាវ កាំបិត នៅតាមសាលារៀន

អ្នកនាំពាក្យស្នងការដ្ឋាននគរបាលរាជធានីភ្នំពេញវរសេនីយ៍ឯក សំ វិច្ឆិកា ថាសមត្ថកិច្ច​នឹងចាប់ផ្ដើមចុះពិនិត្យនៅតាមសាលារៀនក្នុងរាជធានីភ្នំពេញ ហើយបើសិនជារកឃើញថាសិស្សណាមានកាំបិត ដាវ ឬសម្ភាៈដែលបង្កគ្រោះថ្នាក់ប៉ះពាល់ដល់អាយុជីវិត ឬរបួសស្នាម គឺនឹងចាប់មានវិធានការតាមផ្លូវច្បាប់។

ថ្លែងប្រាប់អ្នកសារព័ត៌មាននឹងត្រូវបានក្រសួងព័ត៌មានចុះផ្សាយនៅថ្ងៃទី៩ ខែមករានេះ លោក សំ វិច្ឆិកា បានស្នើទៅកាន់អាណាព្យាបាលសិស្សឱ្យចូលរួមតាមដាន និងត្រួតពិនិត្យកូនៗរបស់ខ្លួន ជៀសវាងធ្វើឱ្យកូនទទួលនូវវិធានការផ្លូវច្បាប់។

លោកថា កន្លងមកសមត្ថកិច្ចជំនាញតែងតែធ្វើការបង្ក្រាប បានជាបន្ដបន្ទាប់ និងចុះត្រួតពិនិត្យនៅតាមសាលារៀន ហើយជាលទ្ធផលមិនទាន់ឃើញមានសិស្សានុសិស្ស ដាក់អាវុធតាមខ្លួននោះទេ។ ទោះជាយ៉ាងណាពេលនេះនឹងបន្តចុះពិនិត្យជាបន្តទៀត។

អ្នកនាំពាក្យរូបនេះបានបញ្ជាក់ទៀតថា ដើមឆ្នាំ២០២៥នេះ ពោលគិតចាប់ពីថ្ងៃទី០៣ ដល់ថ្ងៃ ទី០៧ ខែមករា សមត្ថកិច្ចបន្តបង្ក្រាបបទល្មើសអសន្តិសុខ១៣ករណី ឃាត់មនុស្ស៣១នាក់ ក្នុងនោះមានករណីក្មេងទំនើងបង្កហិង្សា០៥ករណី ដែលភាគច្រើនសុទ្ធសឹងជាមុខសញ្ញាក្មេងទំនើង មកពីតាមបណ្តាខេត្ត ជាប់ភូមិសាស្ត្ររាជធានីភ្នំពេញដូចជា ខេត្តកណ្តាល ខេត្តតាកែវ កំពង់ស្ពឺជាដើម។

វិធានការក្ដៅរបស់អាជ្ញាធរនេះគឺបន្ទាប់ពីមានបញ្ជាកាលពីថ្ងៃទី២៦ ខែធ្នូ ឆ្នាំ២០២៤ ពីនាយករដ្ឋមន្ត្រី សម្ដេចធិបតី ហ៊ុន ម៉ាណែត ឱ្យបង្កើនសកម្មភាពបង្ក្រាបឱ្យអស់ក្មេងទំនើងបញ្ជូនទៅតុលាការ ក្នុងនោះក៏ឱ្យពិនិត្យផងដែរក្មេងទំនើងណាដែលដាក់ដាវ កាំបិត តាមម៉ូតូ និងថតលើបណ្ដាញសង្គមគំរាមអ្នកដទៃ។

សម្ដេចថា ការអនុវត្តច្បាប់តឹងរឹងលើក្រុមក្មេងទំនើងគឺជាការជួយដល់ពួកគេ ជួយដល់ឪពុកម្ដាយរបស់ពួកគេ និងជួយដល់ពលរដ្ឋផ្សេងទៀត។ វាមិនមែនជារឿងដែលត្រេកអរនោះទេដែលចាប់ក្មេងទាំងនោះទៅឃុំនៅមណ្ឌលអប់រំកែប្រែនោះ តែដើម្បីការពារសណ្ដាប់ធ្នាប់សង្គម និងមនុស្សរាប់ម៉ឺននាក់ទៀតដែលអាចទទួលផលប៉ះពាល់ពីក្មេងទាំងនេះបើនៅតែបណ្ដោយដោយគ្មានការអនុវត្តច្បាប់តឹងរឹង៕

អត្ថបទដោយ ហ៊ុន សិរីវឌ្ឍន៍