នាយកដ្ឋានបង្ការពន្លត់អគ្គិភ័យ គ្រោងបំពាក់​លេខ Hotline 118 នៅតាមបណ្ដារាជធានី ខេត្ត ទូទាំងប្រទេស ដើម្បីអន្តរាគមន៍ទាន់ពេលវេលា

នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ គ្រោងបំពាក់លេខ Hotline 118 នៅតាមបណ្ដារាជធានី ខេត្ត ទូទាំងប្រទេស ដើម្បីងាយស្រួលជួយអន្តរាគមន៍ករណីគ្រោះអគ្គិភ័យដែលកើតឡើងជាយថាហេតុឲ្យបានលឿង រហាស់ និងតម្លាភាពជូនប្រជាពលរដ្ឋ។ នេះបើតាមការបញ្ជាក់ពីលោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ ប្រាប់ កម្ពុជាថ្មី នៅព្រឹកថ្ងៃទី១ ខែកុម្ភៈ ឆ្នាំ២០២៥នេះ។

លោក នេត វន្ថា បញ្ជាក់ថា ការបង្កើតលេខ Hotline 118​ នេះ គឺដើម្បីងាយស្រួលឲ្យប្រជាពលរដ្ឋនៅតាមបណ្ដារាជធានី ខេត្ត ដែលជួបប្រទះនូវករណីគ្រោះអគ្គិភ័យដែលមិនអាចគ្រប់គ្រងបាន ប្រជាពលរដ្ឋអាចទំនាក់ទំនងផ្ទាល់ទៅអង្គភាពពន្លត់អគ្គិភ័យរាជធានី ខេត្ត ដើម្បីចេញអន្តរាគមន៍ទាន់ពេលវេលា។ លោកបន្ថែមថា «ប្រសិនបើមានករណីគ្រោះអគ្គិភ័យកើតឡើង ហើយប្រជាពលរដ្ឋរវល់តែតេទៅវិទ្យុ ឬស្ថានីយណាមួយក្រៅពីអ្នកជំនាញ យើងឃើញថា ភ្លើងវាអត់ចាំយើងទេ អ៊ីចឹងការជួយអន្តរាគមន៍វាក៏មិនសូវទទួលបានលទ្ធផលល្អដែរ ទើបនាយកដ្ឋានគ្រោងបំពាក់លេខ Hotline នេះនៅតាមបណ្ដារាជធានី ខេត្ត ដើម្បីទទួលបានការហៅចូលលឿន និងរហ័ស»។

ជាមួយគ្នានេះ ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ ក៏សំណូមពរដល់ប្រជាពលរដ្ឋទាំងអស់សូមចូលរួមប្រើប្រាស់សេវា Hotline 118 នេះដើម្បីទទួលបានការអន្តរាគមន៍ទាន់ពេលវេលា។

បើតាមប្រធាននាយកដ្ឋាន បច្ចុប្បន្ននាយកដ្ឋានក៏មានលេខទំនាក់ទំនងផងដែរ បុន្តែប្រើលេខរាយច្រើនទើបធ្វើឲ្យប្រជាពលរដ្ឋមួយចំនួនពិបាកក្នុងការទំនាក់ទំនង តែក្រោយពីបំពាក់លេខ Hotline118 នេះរួចប្រជាពរដ្ឋអាចចុចតែបីលេខនឹងជូនដំណឹងដល់គោលដៅភ្លាម ហើយក៏មិនមានការកាត់ថ្លៃសេវានោះដែរ។

សូមបញ្ជាក់ថា នៅព្រឹកថ្ងៃទី១ កុម្ភៈ នេះដែរ លោកឧត្តមសេនីយ៍ឯក នេត វន្ថា ក៏បានជូនដំណឹងដល់ស្នងការរងទទួល​ផែន និងនាយការិយាល័យនគរបាលបង្ការ ពន្លត់អគ្គិភ័យ និងសង្រ្គោះរាជធានី ខេត្ត ទាំងអស់ អំពីដំណើរការលេខ Hotline118 ឡើងវិញ បន្ទាប់ពីលេខនេះត្រូវបានផ្អាកដំណើរការមួយរយៈនៅពេលកន្លងមក ដោយសារបញ្ហាបច្ចេកទេស៕

អត្ថបទ៖ សុខុម