អាជ្ញាធរខណ្ឌ៧មករា លាងសម្អាតផ្លូវក្នុងមូល​ដ្ឋាន​ក្រោយភ្លៀងខ្លាំងកាលពីម្សិលមិញ

បន្ទាប់ពីមានភ្លៀងធ្លាក់ខ្លាំងកាលពីម្សិលមិញធ្វើឲ្យផ្លូវមួយចំនួនក្នុងមូលដ្ឋានខណ្ឌ៧មករាមានកាសសំណល់ សំរាម ក៏ដូចជាកំណកដីនៅលើដងផ្លូវ។ នៅថ្ងៃទី២៥ ខែឧសភា ឆ្នាំ២០២៥ អាជ្ញាធរខណ្ឌបានបញ្ចេញរថយន្ដសម្អាតផ្លូវរបស់រដ្ឋបាលខណ្ឌលាងសម្អាតផ្លូវនានា ដើម្បីសោភណភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ថេង សុថុល អភិបាលនៃគណអភិបាលខណ្ឌ៧មករា​ បានបញ្ជាក់ថា ប្រសិនជាប្រជាពលរដ្ឋមិនមានការយល់ដឹងពីបញ្ហាសំរាម និងការទុកដាក់គ្មានសណ្ដាប់ធ្នាប់វាជាហេតុនាំឲ្យមានការជន់លិច ពេលមានភ្លៀងធ្លាក់មកសំរាមទាំងនោះហូរចូលទៅតាមមាត់លូ ធ្វើឲ្យទឹកមិនអាចហូរទៅរួច មានការជន់លិចនៅក្នុងមូលដ្ឋាន និងចូលទៅតាមផ្ទះប្រជាពលរដ្ឋធ្វើឲ្យខូចខាតទ្រព្យសម្បត្តិមួយចំនួផងដែរ។

លោកអភិបាលបានសំណូមពរដល់ប្រជាពលរដ្ឋដែលរស់នៅក្នុងមូលដ្ឋានខណ្ឌ៧មករា ទាំងអស់មេត្តាទុកដាក់សំរាមឲ្យបានត្រឹមត្រូវ និងយកសំរាមមកចោលតាមម៉ោងកំណត់របស់ក្រុមហ៊ុនប្រមូលសំរាមនីមួយៗ ជៀសវាងការចោលសំរាមទុកដាក់គ្មានសណ្ដាប់ធ្នាប់ ជាហេតុធ្វើអោយបាត់បង់សោភណភាពក្នុងមូលដ្ឋាន៕

អត្ថបទ៖ ម៉េង