សន្តិសុខសង្គម

បញ្ជូនខ្លួនជនសង្ស័យម្នាក់ទៅស្នងការដ្ឋាននគរបាលខេត្តក្រចេះ ពាក់ព័ន្ធករណីវាយកូនស្រី និងម្ដាយបង្កើតស្លាប់

បានផុស

១ year មុន

នៅ

ថ្ងៃពុធ ១១ មិថុនា ២០២៥

ដោយ

ជនសង្ស័យម្នាក់ ដែលវាយកូនស្រីបង្កើត និងម្ដាយបង្កើតបណ្តាលឱ្យស្លាប់កាលពីយប់ថ្ងៃទី១០ ខែមិថុនា ឆ្នាំ២០២៥ នៅឃុំឃ្សឹម ស្រុកស្នួល ខេត្តក្រចេះ ត្រូវបានកម្លាំងនគរបាលចាប់ឃាត់ខ្លួនបញ្ជូនទៅកាន់ស្នងការដ្ឋាននគរបាលខេត្តក្រចេះហើយ នៅរសៀលថ្ងៃទី១១ ខែមិថុនា នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យមានឈ្មោះ ប៊ិញ ភីរុន ភេទប្រុស អាយុ ៣២ ឆ្នាំ រស់នៅភូមិកើតហេតុខាងលើ (ជាមុខសញ្ញាប្រើប្រាស់គ្រឿងញៀន) បានធ្វើសកម្មភាពយកដុំឥដ្ឋវាយទៅលើម្ដាយបង្កើត និងកូនបង្កើតរបស់ខ្លួន បណ្ដាលឲ្យស្លាប់បាត់បង់ជីវិតទាំងពីរនាក់ ខណៈពេលដែលបញ្ជូនមកដល់មន្ទីរពេទ្យបង្អែកស្រុកស្នួល។

ជនរងគ្រោះឈ្មោះ យ៉េន មឿន ភេទស្រី អាយុ ៦៦ឆ្នាំ ជនជាតិខ្មែរ (ជាម្តាយបង្កើត) ត្រូវចំក្បាលផ្នែកខាងក្រោយបណ្តាលឲ្យរងរបួសធ្ងន់ បន្ទាប់មកជនសង្ស័យបានបន្តធ្វើសកម្មភាពយកដុំឥដ្ឋដដែលបន្តវាយទៅលើកូនបង្កើតស្រីរបស់ខ្លួន ឈ្មោះ ណ រ ភេទស្រី អាយុ ៣ឆ្នាំ ត្រូវចំក្បាលរងរបួសធ្ងន់។ បន្ទាប់មកជនរងគ្រោះ ត្រូវបានសាច់ញាតិដឹកយកមកសង្រ្គោះ និងបានស្លាប់បាត់បង់ជីវិតទាំង ២នាក់ នៅមន្ទីរពេទ្យបង្អែក ស្រុកស្នួល ។

ប្រភពពីសមត្ថកិច្ចបានឲ្យដឹងថា ហេតុការណ៍នេះកើតឡើងនៅថ្ងៃទី១០ ខែមិថុនា ឆ្នាំ២០២៥ វេលាម៉ោង ២៣និង៣០នាទី នៅ ចំណុចផ្ទះជនរងគ្រោះ ស្ថិតនៅភូមិឃ្សឹមក្រៅ ឃុំឃ្សឹម ស្រុកស្នួល ខេត្តក្រចេះ។

ក្រោយពីទទួលបានព័ត៌មានខាងលើសមត្ថកិច្ចជំនាញ សហការជាមួយកម្លាំងប៉ុស្តិ៍នគរបាលរដ្ឋបាលឃ្សឹម បានចុះទៅដល់កន្លែងកើតហេតុធ្វើការពិនិត្យស្រាវជ្រាវស្វែងរកចាប់ខ្លួនជនសង្ស័យជាបន្តបន្ទាប់ រហូតដល់វេលាម៉ោង ៣និង០០នាទី ទាបភ្លឺឈានចូលថ្ងៃទី១១ ខែមិថុនា ឆ្នាំ២០២៥ សមត្ថកិច្ចបានឈានទៅដល់ការឃាត់ខ្លួនជនសង្ស័យ ឈ្មោះ ប៊ិញ ភីរុន នៅចំណុចព្រៃចំការស្វាយ ស្ថិតនៅភូមិឃ្សឹមក្រៅ ឃុំឃ្សឹម ស្រុកស្នួល ខេត្តក្រចេះ និងចាប់យកសំភារៈវត្ថុតាង បំណែកដុំឥដ្ឋ។

ក្រោយពីធ្វើការសាកសួរជនសង្ស័យឈ្មោះ ប៊ិញ ភីរុន បានឆ្លើយសារភាពថា រូបខ្លួនពិតជាបានធ្វើសកម្មភាពយកដុំឥដ្ឋវាយទៅលើម្តាយបង្កើតឈ្មោះ យ៉េន មឿន ត្រូវចំក្បាលផ្នែកខាងក្រោយរួចអូសជនរងគ្រោះជាម្តាយទម្លាក់ពីលើផ្ទះចុះមកដី ហើយបន្តយកដុំឥដ្ឋវាយទៅលើជនរងគ្រោះបន្ថែមទៀតរហូតសន្លប់បាត់ ស្មារតី បន្ទាប់មករូបខ្លួនបានឡើងទៅលើផ្ទះយកដុំឥដ្ឋធ្វើសកម្មភាពវាយទៅលើជនរងគ្រោះជាកូនស្រីបង្កើត ឈ្មោះ ណ រ ដែលកំពុងតែដេកលក់ត្រូវចំក្បាលរួចបានចាប់បោះកូនស្រីពីលើផ្ទះមកដីហើយរូបខ្លួនបានចុះមកបន្តវាយទៅលើកូន និងម្តាយបង្កើតបន្ថែមទៀតរហូតសន្លប់បាត់ស្មារតីទាំង ២នាក់ប្រាកដមែន។ មូលហេតុដោយរូបខ្លួនខឹងនឹងម្តាយតែងតែស្តីបន្ទោស និងជេររូបខ្លួនថា អាក្របីទើបរូបខ្លួនខឹងមួរម៉ៅក៏វាយសម្លាប់ម្តាយបង្កើត និងកូនង្កើតរបស់ខ្លួនប្រាកដមែន។

បច្ចុប្បន្ន ជនសង្ស័យឈ្មោះ ប៊ិញ ភីរុន ត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលស្រុកស្នួល ដើម្បីកសាងសំណុំរឿងបញ្ចូនទៅស្នងការដ្ឋាននគរបាលខេត្តក្រចេះចាត់ការតាមនីតិវិធី៕

អត្ថបទ ៖ ប្រុញ វិធិន