ព័ត៌មានអន្ដរជាតិ

តាមពិតបុរសវាយទាហាន កម្ពុជា គឺជាពួកជ្រុលនិយមក្នុងប្រទេសថៃ

បានផុស

១២ ខែ មុន

នៅ

ថ្ងៃចន្ទ ១៤ កក្កដា ២០២៥

ដោយ

បន្ទាប់ពីបុរសជនជាតិថៃមួយរូប បានលួចវាយទាហានកម្ពុជានៅប្រាសាទតាមាន់ធំ កាលពីថ្ងៃទី១៣ ខែកក្កដា ឆ្នាំ២០២៥ នោះ បានបង្កឲ្យមានរឿងរ៉ាវផ្អើលបណ្ដាញសារព័ត៌មានធំៗជាច្រើន។ ភ្លាមៗនោះដែរ កងទ័ពថៃបានចេញសេចក្តីថ្លែងការណ៍ ដោយធ្វើការឃាត់ខ្លួនជនដៃមកសួរនាំបន្តតាមនីតិវិធីច្បាប់ ហាក់ទំនងជាភ័យខ្លាចបញ្ហានេះប៉ះពាល់ដល់ទំនាក់ទំនងកម្ពុជានិងថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យកងទ័ពថៃ បានកំណត់អត្តសញ្ញាណបុរសនោះថា ជនបង្កហេតុគឺជាអតីតអនុរក្សយោធាម្នាក់ ឈ្មោះ Sommai Srisukranan ជាប្រធានក្លឹបអនុរក្សយោធានៅជំរុំ Pak Thong Chai ក្នុងខេត្ត Nakhon Ratchasima។ បុរសដែលត្រូវចាប់ខ្លួន ក៏ដឹកនាំបណ្តាញអតីតយុទ្ធជនក្នុងខេត្តសាមុតសាខនផងដែរ។

ទោះជាបែបនេះក្ដី មុនពេលមានរឿងលួចវាយប្រហារទាហានកម្ពុជា អតីតអនុរក្សរូបនេះធ្លាប់ចូលរួមការតវ៉ាតាមដងផ្លូវកាលពីកន្លងមក ដោយទាមទារដាច់ខាតឲ្យទម្លាក់នាយករដ្ឋមន្ត្រី ផែថងថាន ស៊ីណាវ៉ាត្រ ចុះចេញពីតំណែង ដើម្បីបង្ហាញទំនួលខុសត្រូវលើឃ្លិបដែលបែកធ្លាយការសន្ទនាជាមួយសម្តេចតេជោ ហ៊ុន សែន ប្រធានព្រឹទ្ធសភា កន្លងមក។

ថ្វីដ្បិតតែជនកំសាកដែលលបវាយប្រហារលើទាហានកម្ពុជា មិនមែនជាបុគ្គលមានអំណាចឬតំណែងនៅក្នុងសភាយ៉ាងណាក្ដី។ ប៉ុន្តែជនជ្រុលនិយមថៃរូបនេះ ធ្លាប់បានបោះសម្ដីយ៉ាងឡូយទៅកាន់ប្រជាជនខ្លួនថា «ខ្ញុំបដិសេធមិនចង់ឃើញថៃត្រូវជាន់ឈ្លីទេ ខ្ញុំសុខចិត្តស្លាប់នៅព្រំដែន ជាជាងឈរមើលមេដឹកនាំពួកយើងឱនក្បាលដាក់ខ្មាំងដែលទន្ទ្រានដីយើង»។

ពេលនោះលោកបានសង្កត់ធ្ងន់ថា «បើថៃត្រូវបាត់បង់ឯករាជ្យនោះ លោកសុំឲ្យខ្លួនឯងធ្លាក់លើដីមុនគេ។ មុនពេលទង់ផ្សេងទៀតហោះហើរជំនួសវិញ»។ ភ្លាមៗនោះ ក្រុមអ្នកដែលបានចូលរួមតវ៉ាស្រាប់តែរង្គោះរង្គើចិត្ត នូវពាក្យសម្ដីប៉ុន្មានម៉ាត់នោះ ដោយចាត់ទុកថា នេះជាសំឡេងមនុស្សសាមញ្ញម្នាក់ដែលស្រឡាញ់ប្រទេសជាតិជាងអាយុជីវិតរបស់ខ្លួន។

**ជនដៃដល់ដែលចូលរួមតវ៉ាតាមដងផ្លូវ កាលពីកន្លងមក, រូបភាព៖ Thailand FACT Today**

ដោយឡែក ងាកមកកាន់រឿងរ៉ាវកំពុងក្ដៅគគុក ដែលជនជាតិថៃសាងឡើងមកដោយក្ដីអាម៉ាស់ដល់ប្រទេសជាតិនេះដែរ បន្ទាប់ពីវាយប្រហារមលលើទាហានខ្មែររួច ជនកំសាកនោះនៅតែបង្ហាញសកម្មភាពច្រង៉េងច្រង៉ាងគ្មានសីលធម៌ ហើយថែមទាំងស្រែកថា «កម្ពុជាមើលងាយប្រជាជនថៃ វាជាការប្រមាថដល់ទាហានថៃ» ភ្លាមៗនោះ មន្ត្រីយោធាបានព្យាយាមធ្វើឲ្យបុរសនោះស្ងប់ចិត្ត កុំបញ្ចេញសកម្មភាពលើសលួសមកលើកម្ពុជាបន្តទៀត។

គួរបញ្ចាក់បន្ថែមទៀតថា ជ្រុលនិយមថៃនិងគូកនប៉ុន្មាននាក់ដែលបង្ករឿងនេះ ក៏ធ្លាប់បានចូលរួមជាមួយជនជាតិថៃមួយក្រុមផ្សេងទៀត ដើម្បីធ្វើសកម្មភាពជានិមិត្តរូបនៅតំបន់ប្រាសាទតាមាន់ធំ កាលពី ២ ទៅ ៣ ខែមុនរួចមកហើយ។ ក្រុមបុរសទាំងនោះ បានធ្វើដំណើរតាមរថយន្តម៉ាក Chevrolet ពណ៍សំរឹទ្ធ ដែលមានសារផ្សេងៗសរសេរពាសពេញរថយន្ត ព្រមទាំងពាក្យគំរោះគំរើយជាច្រើនប្រមាថទៅដល់ថ្នាក់ដឹកនាំ ព្រមទាំងទាហានកម្ពុជាផងដែរ៕