មន្ត្រីជំនាញ ណែនាំអ្នកលេងបណ្ដាញសង្គមពីរបៀប​ចែករំលែកព័ត៌មានចៀសវាងប៉ះពាល់ដល់កិច្ចផ្ទៃក្នុងរបស់កងទ័ព

នាយកដ្ឋានប្រឆាំងបទល្មើសបច្ចេកវិទ្យា នាព្រឹកថ្ងៃទី៤ ខែសីហា ឆ្នាំ២០២៥នេះ បានអំពាវនាវ ក៏ដូចជាធ្វើការណែនាំដល់អ្នកលេងបណ្ដាញសង្គមមួយចំនួនដើម្បីចៀសវាងការចែករំលែកព័ត៌មានដែលធ្វើឲ្យមានភាពចលាចល បំភិតបំភ័យ ជាពិសេសប៉ះពាល់ការស៊ើបអង្កេតកិច្ចការផ្ទៃក្នុងរបស់កងទ័ពយោធា និងនគរបាលជាតិ។ បើតាមនាយដ្ឋានប្រឆាំងបទល្មើសបច្ចេកវិទ្យា ការចែករំលែកព័ត៌មានដែលមិនត្រឹមត្រូវតាមបណ្តាញសង្គម នឹងធ្វើអោយសត្រូវបានដឹងពីការចាប់បានរបស់ចារកិច្ចរបស់ខ្លួន។

ការចេញមកអំពាវនាវ និងណែនាំនេះ​ ធ្វើឡើងបន្ទាប់ពីនាយកដ្ឋានប្រឆាំងបទល្មើសបច្ចេកវិទ្យា សង្កេតឃើញថា ក្នុងអំឡុងសង្គ្រាមឈ្លានពានរបស់ថៃតាមព្រំដែនកម្ពុជា-ថៃ មានការផ្សព្វផ្សាយព័ត៌មានមិនត្រឹមត្រូវតាមបណ្តាញសង្គមមួយចំនួន ធ្វើអោយមានភាពចលាចល បំភិតបំភ័យ ជាពិសេសប៉ះពាល់ការស៊ើបអង្កេត កិច្ចការផ្ទៃក្នុងរបស់កងទ័ពយោធា និងនគរបាលជាតិ ព្រមទាំងធ្វើអោយសត្រូវបានដឹងពីការចាប់បានរបស់ចារកិច្ចរបស់ខ្លួនថែមទៀត។

ក្នុងន័យនេះ នាយកដ្ឋានប្រឆាំងបទល្មើសបច្ចេកវិទ្យា បានណែនាំឲ្យសាធារណជនត្រូវចែករំលែកព័ត៌មានណាដែលត្រូវចែករំលែក និងព័ត៌មានណាដែលមិនត្រូវចែករំលែក។

ព័ត៌មានដែលយើងទាំងអស់គ្នាគួរចែករំលែកមានដូចជា សេចក្តីប្រកាសផ្លូវការរបស់រាជរដ្ឋាភិបាល និងស្ថាប័នយោធា ការណែនាំរបស់រាជរដ្ឋាភិបាល និងអាជ្ញាធរ ព័ត៌មានជំនួយមនុស្សធម៌ និងព័ត៌មានដែលជំរុញទឹកចិត្ត និងសាមគ្គីភាពជាតិ ។

ចំណែកឯកព័ត៌មានដែលយើងទាំងអស់គ្នាមិនគួរចែករំលែក គឺព័ត៌មានមិនពិត និងព័ត៌មានបំភ្លៃ (Fake News & Disinformation) ពាក្យចចាមអារ៉ាម ឬព័ត៌មានមិនពិតដែលគ្មានប្រភពច្បាស់លាស់ ព័ត៌មានអុជអាល ឬញុះញង់ ព័ត៌មានផ្ទាល់ខ្លួន និងក្រុមគ្រួសារ ព័ត៌មានជនរងគ្រោះ និងយោធា កុំបង្ហោះបង្ហាញទីតាំង ចលនា ហើយហេដ្ឋាសម្ព័ន្ធសំខាន់ៗ និងប្រតិបត្តិការរបស់យោធា កុំចែករំលែករូបថតវីដេអូ ឬព័ត៌មានលម្អិតគ្រឿងសព្វាវុធ និងមូលដ្ឋានរបស់យោធា សូម្បីតែរូបភាព ឬវីដេអូសាមញ្ញក៏អាចបង្ហាញព័ត៌មានរសើបបានដែរ។ កុំបង្ហោះឬផ្សាយផ្ទាល់ពីតំបន់មានជម្លោះ កុំចែករំលែករបាយការណ៍គ្មានមូលដ្ឋាន អំពីការស្លាប់បាត់បង់ជីវិត ឬឯកសារពីយោធា កុំប៉ាន់ស្មាន ឬបង្ហោះព័ត៌មានរបស់យោធាដែលបានបែកធ្លាយឡើងវិញ កុំពិភាក្សាអំពីឈ្មោះកងពល និងប្រភេទកងកម្លាំងយោធា៕