សន្តិសុខសង្គម

នគរបាលក្រុង បញ្ជូនជនសង្ស័យ ០៥ នាក់ ទៅតុលាការ ករណីចាប់បង្ខាំងមនុស្សជំរិតទារប្រាក់

បានផុស

១១ ខែ មុន

នៅ

ថ្ងៃអង្គារ ៥ សីហា ២០២៥

ដោយ

នៅរសៀលថ្ងៃទី ០៥ ខែសីហា ឆ្នាំ ២០២៥ នេះ ការិយាល័យនគរបាលព្រហ្មទណ្ឌកម្រិតស្រាល បានបញ្ជូនខ្លួនជនសង្ស័យជនជាតិចិន-ខ្មែរ ចំនួន ០៥ នាក់ ដែលធ្វើសកម្មភាពចាប់បង្ខាំងមនុស្ស ដើម្បីជំរិតទារប្រាក់ ទៅកាន់តុលាការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យចិន-ខ្មែរ ចំនួន ០៥ នាក់ រួមមាន ៖ ០១-ឈ្មោះ CAO ZHI PENG ភេទប្រុស អាយុ ៤៤ ឆ្នាំ ជនជាតិចិន (គ្មានលិខិតឆ្លងដែន) , ០២-ឈ្មោះ ZHANG XUESHUANG ភេទប្រុស អាយុ ៣៩ ឆ្នាំ ជនជាតិចិន (គ្មានលិខិតឆ្លងដែន) , ០៣-ឈ្មោះ ផេង ចន្ទតារា ភេទប្រុស អាយុ ៥៣ ឆ្នាំ ជនជាតិខ្មែរ , ០៤-ឈ្មោះ ម៉េង ហួត ភេទប្រុស អាយុ ២៦ ឆ្នាំ ជនជាតិខ្មែរ និង ០៥-ឈ្មោះ តាំង លីម៉ី ភេទស្រី អាយុ ៤៣ ឆ្នាំ ជនជាតិខ្មែរ។

លោកឧត្ដមសេនីយ៍ត្រី ប៊ុន សត្យា ស្នងការរងទទួលបន្ទុកការងារព្រហ្មទណ្ឌ បានឲ្យដឹងថា នៅវេលាម៉ោង ១១ និង ៤០ នាទីព្រឹក ថ្ងៃទី ០៣ ខែសីហា ឆ្នាំ ២០២៥ ការិយាល័យព្រហ្មទណ្ឌកម្រិតស្រាល បានទទួលជនសង្ស័យចំនួន ០៥ នាក់ និងជនរងគ្រោះចំនួន ០១ នាក់ ពីអធិការដ្ឋាននគរបាលខណ្ឌពោធិ៍សែនជ័យ ដែលបានឃាត់ខ្លួនកាលពីវេលាម៉ោង ១២ និង ២០ នាទីយប់រំលងអធ្រាត្រ ឈានចូលថ្ងៃទី ០៣ ខែសីហា ឆ្នាំ ២០២៥ នៅចំណុចបន្ទប់លេខ ២០២ ផ្ទះសំណាក់ លឹម ហេង ភូមិជ្រៃកោង សង្កាត់ចោមចៅទី ០២ ខណ្ឌពោធិ៍សែនជ័យ រាជធានីភ្នំពេញ ពាក់ព័ន្ធករណី ចាប់ ឃុំឃាំង និងបង្ខាំងដោយខុសច្បាប់។

បច្ចុប្បន្ន សមត្ថកិច្ច បានបញ្ជូនជនសង្ស័យទាំង ០៥ នាក់ ទៅកាន់សាលាដំបូងរាជធានីភ្នំពេញ ដើម្បីប្រគល់សំណុំរឿងទៅកាន់តុលាការបន្តនីតិវិធីច្បាប់៕

អត្ថបទ ៖ រដ្ឋា