សន្តិសុខសង្គម

អាវុធហត្ថរាជធានី សហការជាមួយអាវុធហត្ថខណ្ឌសែនសុខ ប្រដេញឃាត់រថយន្តមួយគ្រឿង សង្ស័យករណីចាប់ជំរិត

បានផុស

៨ ខែ មុន

នៅ

ថ្ងៃពុធ ២០ សីហា ២០២៥

ដោយ

កម្លាំងកងរាជអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថខណ្ឌសែនសុខ បានប្រដេញតាមឃាត់រថយន្តមួយគ្រឿងសង្ស័យពាក់ព័ន្ធករណីចាប់ជំរិត។ តែទោះយ៉ាងណា មន្ត្រីអាវុធហត្ថនៅមិនទាន់បញ្ជាក់លំអិតនៅឡើយទេ។

ករណីនេះបានកើតឡើងវេលាម៉ោង៨និង៣០នាទីយប់ ថ្ងៃទី១៩ ខែសីហា ឆ្នាំ២០២៥ នៅក្នុងបុរីភ្នំពេញថ្មី ផ្លូវ១០០៧ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

តាមប្រភពព័ត៌មាន បានឲ្យដឹងថា ករណីនេះកម្លាំងអាវុធហត្ថបានប្រដេញតាមរថយន្តមួយគ្រឿងម៉ាក GAC ពណ៌ខ្មៅ មិនមានស្លាកលេខ ដែលបើកបរដោយបុរសជនជាតិខ្មែរ សង្ស័យពាក់ព័ន្ធករណីចាប់ជំរិតលើស្ត្រីជនជាតិចិន តាមបណ្តោយផ្លូវ ១០០៣។ ក្នុងអំឡុងពេលរត់គេច រថយន្ដសង្ស័យបានបុករទេះលក់សាច់អាំងនៅចិញ្ចើមផ្លូវបណ្ដាលឲ្យរងការខូចខាត និងព្យាយាមបើករត់គេបន្ត។

ប្រភពបានបន្តថា នៅពេលបើករត់មកដល់ក្នុងបុរីភ្នំពេញថ្មី ផ្លូវ១០០៧ ក៏មានសំឡេងផ្ទុះអាវុធ ២គ្រាប់ ធ្វើឲ្យរថយន្តបែកកង់ និងឈានដល់ការឃាត់បានទាំងរថយន្ត និងជនសង្ស័យជាបុរសជនជាតិខ្មែរម្នាក់ និងបានរំដោះស្ត្រីជនជាតិចិនម្នាក់ចេញពីក្នុងរថយន្ត។

កម្លាំងអាវុធហត្ថបានបញ្ជាក់ថា ករណីនេះសង្ស័យជាករណីចាប់ជំរិត ប៉ុន្តែមិនទាន់អាចបង្ហាញព័ត៌មានលំអិតបន្ថែមនៅឡើយទេ។ ជនសង្ស័យ និងរថយន្តត្រូវបាននាំទៅមូលដ្ឋានអាវុធហត្ថខណ្ឌសែនសុខ ដើម្បីសួរនាំបន្តតាមនិតិវិធី៕

អត្ថបទ៖ សំណាង