រដ្ឋបាលសង្កាត់ចោមចៅទី៣​ ណែនាំឲ្យអ្នកលក់ដូរ​លើចិញ្ចើមផ្លូវសហព័ន្ធរុស្ស៊ីបញ្ឈប់ការលក់ដូរជាបន្ទាន់

នៅរសៀលថ្ងៃទី១៧​ ខែកញ្ញា​ ឆ្នាំ២០២៥​ នេះរដ្ឋបាលសង្កាត់ចោមចៅទី៣​ បានចេញសេចក្តីជូនដំណឹងដល់អាជីវករ​ទាំងអស់ដែលលក់ដូរលេីចញ្ចេីមផ្លូវសហព័ន្ធរុស្សី ស្ថិតនៅភូមិព្រៃទា១ ភូមិព្រៃទា២ និងភូមិព្រៃជីសាក់ ត្រូវបញ្ឈប់ជាបន្ទាន់លើការប្រកបរបរលក់ដូរលើចិញ្ចើមផ្លូវ បេីមិនអនុវត្តតាមណែនាំនោះទេ អាជ្ញាធរនឹងចាត់វិធានការតាមនីតិវិធី។

លោក​ វ៉ា​ សាវឿន​ ចៅសង្កាត់ចោមចៅទី៣​ ប្រាប់ កម្ពុជាថ្មី ឱ្យដឹងថា​ ការជូនដំណឹងនេះ ដោយសារតែមើល​ឃេីញ​ទង្វេីបងប្អូនអាជីវករមួយចំនួនបានយកចំណីផ្លូវសាធារណៈមកប្រកបរបរផ្ទាល់ខ្លួន​ ហើយពេលខ្លះអង្គុយផឹកស៊ីមិនដឹងពេលវេលា​ បង្កជាជម្លោះវាយតប់គ្នាយ៉ាងអនាធិបតិយ្យស្ទេីររាល់ថ្ងៃធ្វើឲ្យបាត់បង់សណ្តាប់ធ្នាប់​សាធារណៈ។

យោងតាមសេចក្ដីជូនដំណឹងរបស់រដ្ឋបាលសង្កាត់ចោមចៅទី៣ ការជូនដំណឹងនេះ បន្ទាប់ពីមើលឃើញមានប្រជាពលរដ្ឋ មួយចំនួនបានលក់ដូររបស់របសផ្សេងៗ នៅលើចញ្ចើមផ្លូវសាធារណៈខុសនឹងច្បាប់ និងធ្វើឱ្យមានការកកស្ទះចរាចរណ៍ និង ប៉ះពាល់ដល់សណ្តាប់ធ្នាប់សោភ័ណភាព និងសុវត្តិភាពសាធារណៈ។

ក្នុងសេចក្ដីជូនដំណឹង បញ្ជាក់ថា ក្នុងករណីប្រជាពលរដ្ឋ ក៏ដូចជាអាជីវកតមិនអនុវត្តតាមខ្លឹមសារនៃការដំណឹងទេ រដ្ឋបាលសង្កាត់ចោមចៅទី៣ នឹងមានវិធានការចុះរុះរើ និងដកហូតដោយមិនទទួលខុសត្រូវរាល់បាត់បង់ ខូចខាតទ្រព្យសម្បត្តិ និងសម្ភារៈផ្សេងៗ ដែលមាននៅលើទីតាំងនោះឡើយ។ ចំពោះរាល់ការចំណាយក្នុងការអនុវត្តការងាររុះរើ និងដកហូតនេះ ជាបន្ទុករបស់បងប្អូនប្រជាពលរដ្ឋ ដែលជាម្ចាស់ទីតាំងត្រូវទទួលខុសត្រូវទាំងស្រុង៕

អត្ថបទ៖ សុខា