កីឡា

ខ្សែប្រយុទ្ធ Patrick ថា ការប្រកួតនៅសិង្ហបុរីយប់មិញរីករាយបំផុត

បានផុស

៥ ខែ មុន

នៅ

ថ្ងៃសុក្រ ៦ កុម្ភៈ ២០២៦

ដោយ

ខ្សែប្រយុទ្ធ Patrick Robson ស៊ុតបាន ២ គ្រាប់ម្នាក់ឯងជួយឲ្យ ព្រះខ័នរាជស្វាយរៀង ទទួលបានជ័យជម្នះលើក្រុមខ្លាំង Lion City Sailors ដោយលទ្ធផល ២-០ នាយប់ថ្ងៃទី៥ ខែកុម្ភៈ ឆ្នាំ ២០២៦ នៅប្រទេសសិង្ហបុរី ក្នុងពានរង្វាន់ ASEAN Club Championship វគ្គសន្សំពិន្ទុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករសញ្ជាតិប្រេស៊ីលរូបបាននិយាយនៅក្នុងសន្និសីទសារព័ត៌មានក្រោយការប្រកួតថា រូបគេពិតជាសប្បាយរីករាយបំផុតដែលរកបាន ២ គ្រាប់ ទល់នឹងក្រុមខ្លាំង ហើយការប្រកួតនេះក្រុមព្រះខ័នរាជស្វាយរៀង ពិតជាធ្វើបានល្អមែនទែន។

កីឡាករ Patrick បាននិយាយថា ៖«ពួកយើងលេងបានល្អថ្ងៃនេះ ហើយនៅតង់ទីពីរ ខ្ញុំរកបាន ២ គ្រាប់។ ពិតជាល្អណាស់ ខ្ញុំពិតជាសប្បាយរីករាយមែនទែនដែលបានក្លាយជាកីឡាករល្អប្រចាំការប្រកួតលើកទី២។ ល្អខ្លាំងណាស់សម្រាប់ខ្ញុំ»។

ព្រះខ័នរាជស្វាយរៀង បានបង្ហាញទម្រង់លេងយ៉ាងល្អតាំងពីចាប់ផ្តើមរហូតដល់ចប់ការប្រកួត។ ទាំងវគ្គទី១ និងវគ្គទី២ ក្រុមតំណាងឲ្យកម្ពុជាមួយនេះបានគ្រប់គ្រងបាល់ភាគច្រើន ដាក់សម្ពាធ និងបង្កើតឱកាសច្រើនលើក្រុមម្ចាស់ផ្ទះ Lion City Sailors ដែលជាក្រុមលេងកម្រិតពានទី២ប្រចាំទ្វីបអាស៊ី។

២គ្រាប់របស់កីឡាករ Patrick រកបាននៅនាទី៥១ និង ៦៤។ ចំណែកក្រុមម្ចាស់ផ្ទះវិញបានសម្រុកលើក្រុម ព្រះខ័នរាជស្វាយរៀង ភាគច្រើននៅចុងម៉ោង ហើយក៏មានឱកាសដែរ ប៉ុន្តែត្រូវបានអ្នកចាំទី វិរៈ ដារ៉ា សង្គ្រោះ។

នេះជាលើកទី ២ ដែលកីឡាករ Patrick ត្រូវបានជ្រើសរើសជាកីឡាករល្អប្រចាំការប្រកួត បន្ទាប់ពីលើកទី១ ទទួលបាននៅពេល ក្រុមព្រះខ័នរាជស្វាយរៀង បានឈ្នះក្រុម Shan United ដោយលទ្ធផល ៣-០ កាលពីថ្ងៃទី២១ ខែសីហា ឆ្នាំ ២០២៥ ក្នុងពានរង្វាន់ ASEAN Club Championship។

ទោះបីជាទទួលបានជ័យជម្នះមែន ប៉ុន្តែព្រះខ័នរាជស្វាយរៀង អស់ឱកាសឡើងវគ្គបន្តហើយ ដោយសារក្រុមរបស់ ម៉ាឡេស៊ី Johor Darul Tazim និង ក្រុមរបស់វៀតណាម Nam Dinh មានពិន្ទុច្រើនជាងបានឡើង។ ព្រះខ័នរាជស្វាយរៀង ត្រូវប្រកួតចុងក្រោយជាមួយក្រុមរបស់ថៃ Bangkok United ប៉ុន្តែមិនទាន់ច្បាស់ពីកាលបរិច្ឆេទឡើយ៕