កីឡា

លេចធ្លោខ្លាំង! ចាន់ វាសនា ឈ្នះពានឯកត្តជន ២ ម្នាក់ឯងក្នុងពានសម្តេច ស ខេង

បានផុស

៣ ខែ មុន

នៅ

ថ្ងៃចន្ទ ២ មីនា ២០២៦

ដោយ

កីឡាករប្រយុទ្ធស្លាបស្តាំ ចាន់ វាសនា របស់ក្រុមស្នងការរាជធានីភ្នំពេញ បានឈ្នះពានឯកត្តជនចំនួន ២ ម្នាក់ឯងនៅក្នុងព្រឹត្តិការណ៍ប្រកួតបាល់ទះពានរង្វាន់សម្តេចក្រឡាហោម ស ខេង លើកទី៤ ដែលបានបញ្ចប់កាលពីថ្ងៃទី១ ខែមីនា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាន់ វាសនា បានដើរតួនាទីយ៉ាងសំខាន់ក្នុងការជួយឲ្យក្រុមបាល់ទះស្នងការរាជធានីភ្នំពេញឈ្នះគ្រប់ការប្រកួតគិតចាប់តាំងពីវគ្គសន្សំពិន្ទុក្នុងពូល រហូតដល់វគ្គផ្តាច់ព្រ័ត្រ ដែលបានធ្វើឲ្យក្រុមរបស់ខ្លួនឈ្នះជើងឯកនេះជាលើកដំបូងក្នុងប្រវត្តិសាស្ត្ររបស់ខ្លួន។

តាមរយៈសមត្ថភាពលេចធ្លោបានផ្តល់ឲ្យ ចាន់ វាសនា បានឈ្នះពានឯកត្តជន ២ ម្នាក់ឯងគឺទី១ ពានកីឡាករល្អជាងគេប្រចាំព្រឹត្តិការណ៍ទាំងមូល និងទី២ ពានកីឡាករប្រយុទ្ធស្លាបស្តាំល្អជាងគេ។ នេះសមិទ្ធផលថ្មីមិនធ្លាប់មានក្នុងអាជីពរបស់ខ្លួន។

ជាមួយគ្នានេះ មិត្តរួមក្រុមរបស់ខ្លួន ៣ នាក់ទៀតគឺ រុន សុខជា បានឈ្នះពានកីឡាករប្រយុទ្ធស្លាបឆ្វេងល្អជាងគេ ហើយអ្នកប៉ះសេ យ៉ុន ខេមរៈ បានឈ្នះពានកីឡាករលើកបាល់ល្អជាងគេ និងកីឡាករ ឧក រដ្ឋា ឈ្នះពានកីឡាកររនាំងការពារល្អជាងគេ។

ចំណែកពានកីឡាករប្រយុទ្ធស្តាំល្អជាងគេមួយទៀតបានទៅកីឡាករ សុខ រ៉ាដូ របស់ក្រុមកងពលធំអន្តរាគមន៍លេខ ៣ និងពានរនាំការពារល្អជាងគេមួយទៀតបានទៅកីឡាករ សោម សេរីសម្បត្តិ របស់វិសាខា។ និយាយរួមពានឯកត្តជនលើកនេះបានទៅកីឡាករលេចធ្លោសម័យក្រោយទាំងអស់ពោលគឺកីឡាករឆ្នើមៗរៀមច្បងមិនមានទទួលបានទេ។

ជើងឯកបានទៅក្រុមស្នងការរាជធានីភ្នំពេញ ទទួលបានប្រាក់រង្វាន់ ៥០ លានរៀល ហើយលេខ ២ បានទៅក្រុមស្នងការខេត្តកោះកុង ទទួលបានប្រាក់រង្វាន់ ២០ លានរៀល។ ចំណែកលេខ ៣ បានទៅ វិសាខា ទទួលបានប្រាក់រង្វាន់ ១២ លានរៀល និងលេខ ៤ កងពលធំអន្តរាគមន៍លេខ៣ ទទួលបានប្រាក់រង្វាន់ ៨ លានរៀល។

សូមបញ្ជាក់ថា ជ័យលាភីឯកត្តជន ម្នាក់ៗទទួលបានប្រាក់រង្វាន់ចំនួន ១ លានរៀលដូចគ្នា៕

ជ័យលាភីបុរស