Zidane សុខចិត្តបដិសេធសំណើលុយជិត ២០០ លានដុល្លារ​ពីក្លិបអាជីព ដើម្បីដឹកនាំជម្រើសជាតិ បារាំង

លោក Zinedine Zidane បានបង្ហាញឆន្ទៈមុតមាំក្នុងការដឹកនាំជម្រើសជាតិ​បារាំង ដោយលោកសុខចិត្តបដិសេធសំណើប្រាក់ពលកម្មជិត ២០០ លានដុល្លារអាមេរិក ដើម្បីមកដឹកនាំក្រុមជើងឯកបាល់ទាត់ជើងឯកពិភពលោក ២០១៨។

កាលពីថ្ងៃ អង្គារ៍ ទី ២៤ ខែ មីនា ឆ្នាំ ២០២៦ កាសែត ESPN និងកាសែត បារាំង Le Parisien បានចុះផ្សាយ ថា លោក Zidane បានឈានដល់កិច្ចព្រមព្រៀងជាផ្លូវការហើយ ដើម្បីដឹកនាំក្រុមជម្រើសជាតិ បារាំង ជំនួសលោក Didier Deschamp បន្ទាប់ពី World Cup 2026 បញ្ចប់។

មុនពេលអតីតគ្រូបង្វឹក Real Madrid វ័យ ៥៣ ឆ្នាំរូបនេះ ឈានដល់កិច្ចព្រមព្រៀងដឹកនាំក្រុមមាន់គក លោកត្រូវបានក្លិបអាជីពជាច្រើនចាប់អារម្មណ៍ ដូចជា Paris Saint-Germain, Manchester United និងក្លិបនៅលីគ អារ៉ាប៉ីសាអ៊ូឌីត។ យ៉ាងណាមិញ ក្លិបនៅ អារ៉ាប៉ីសាអ៊ូឌីត ហ៊ានឱ្យប្រាក់ឈ្នួលដល់លោក Zidane ដល់ទៅ ១៧៤ លានដុល្លារអាមេរិកឯណោះ ក្នុងកុងត្រារយៈពេល ៣ ឆ្នាំ ប៉ុន្តែចុងក្រោយលោកបានបដិសេធ។

គួរឱ្យដឹង ថា លោក Zidane មិនបានទទួលយកសំណើដឹកនាំក្រុមណាមួយទេ បន្ទាប់ពីចាកចេញពី Real Madrid នៅឆ្នាំ ២០២១។ បុរសសញ្ជាតិ បារាំង រូបនេះ បានសាងស្នាដៃជាច្រើន អំឡុងពេលដឹកនាំក្រុមអធិរាជសពីឆ្នាំ ២០១៦-២០១៨ និង ២០១៩-២០២១ ក្នុងនោះមានពាន Champions League ៣ លើក, La Liga ២ លើក, UEFA Super Cup ២ លើក, FIFA Club World Cup ២ លើក និង Spanish Super Cup ២ លើក៕

ប្រែសម្រួល៖ សេម កុសល
ប្រភព៖ Financial Express