កីឡា

កីឡាករថៃល្បីខាងទាត់ធ្ងន់ Tawanchai នឹងឡើងសង្វៀន ONE លើកដំបូងថ្ងៃទី១៥

បានផុស

៥ years មុន

នៅ

ថ្ងៃអង្គារ ៤ ឧសភា ២០២១

ដោយ

កីឡាករប្រដាល់ល្បីៗរបស់ថៃសុទ្ធតែមានគោលបំណងបង្ហាញសមត្ថភាពនៅស្ថាប័នពិភពលោក ONE Championship និងដាក់គោលដៅស្វែងរកខ្សែក្រវាត់ពិភពលោកនៅស្ថាប័ននេះ បន្ទាប់ពីជោគជ័យនៅលើទឹកដីកំណើតរបស់ខ្លួន។

បន្ទាប់ពីកីឡាករថៃមួយចំនួនបានបង្ហាញខ្លួន និងឈ្នះខ្សែក្រវាត់ពិភពលោកជាច្រើននាក់ ឥឡូវនេះតារាប្រដាល់ល្បីឈ្មោះដែលត្រូវបានគេចាត់ទុកជាកីឡាករជួរមុខរបស់ថៃ Tawanchai PK.Saenchai បានសម្រេចបោះជំហានចូលស្ថាប័ន ONE ដែរហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតលើដំបូងនៅសង្វៀនអន្តរជាតិនេះ Tawanchai ត្រូវជួបនឹងកីឡាករចាស់វស្សា Sean Clancy មកពីប្រទេសអៀរឡង់ក្នុងតំណែងគូឯករងនៅព្រឹត្តិការណ៍ ONE: DANGAL នាថ្ងៃសៅរ៍ ទី១៥ ខែឧសភា ឆ្នាំ២០២១នៅប្រទេសសិង្ហបុរី។

Tawanchai ជាកីឡាករម្នាក់ដែលមានប្រជាប្រិយភាពខ្លាំងនៅប្រទេសថៃតាមរយៈអាវុធដ៏ធ្ងន់របស់ខ្លួនគឺការទាត់ និងក្បាច់វ៉ៃពោរពេញដោយបច្ចេកទេស។ ជាពិសេសទៀតនោះ រូបគេជាកីឡាកររូបសង្ហាដែលមានការទាក់ទាញអ្នកគាំទ្រជាយុវវ័យ និងនារីៗយ៉ាងខ្លាំង។ កីឡាករថៃម្នាក់នេះបានចូលប្រឡូកក្នុងប្រដាល់តាំងពី៨ឆ្នាំដែលរហូតដល់ពេលនេះមានប្រវត្តិប្រកួត៩៩ដង ក្នុងនោះឈ្នះ៧៩ដង ចាញ់១៩ដង និងស្មើ១ដង។ រូបគេធ្លាប់ឈ្នះជើងឯកថ្នាក់ជាតិថៃឆ្នាំ២០១៧ និងបានក្លាយជាកីឡាករប្រដាល់ឆ្នើមប្រចាំឆ្នាំ២០១៩។

តាមពិតទៅ Tawanchai បានចុះកុងត្រាចូល ONE តាំងពីឆ្នាំ២០២០ ប៉ុន្តែទើបតែមានឱកាសឡើងប្រកួតនាពាក់កណ្តាលខែឧសភានេះដែលត្រូវជួបអ្នកប្រដាល់អៀរឡង់ Sean Clancy ដែលធ្លាប់បានប្រកួតម្តងហើយនៅសង្វៀនពិភពលោកនេះ។ កាលពីខែកញ្ញា ឆ្នាំ២០១០ Sean Clancy បានប្រកួតលើកដំបូងនៅសង្វៀន ONE និងបានចាញ់ពិន្ទុកីឡាករថៃ Pongsiri ដោយពិន្ទុ។ ប៉ុន្តែបើនិយាយពីបទពិសោធវិញ កីឡាកររូបនេះឆ្លងកាត់ច្រើនគឺ៦២ដង ក្នុងនោះឈ្នះ៤៤ដង ចាញ់១៧ដង និងស្មើ១ដង។ រូបគេក៏ជាម្ចាស់ខ្សែក្រវាត់មួយថៃ WBC និងខ្សែក្រវាត់មួយថៃ ISKA។

សូមបញ្ជាក់ថា គូឯកប្រចាំព្រឹត្តិការណ៍ ONE: DANGAL អធិរាជសង្វៀនទម្ងន់ធ្ងន់ ONE Heavyweight កីឡាករ Brandon Vera ត្រូវឡើងការពារខ្សែក្រវាត់ពិភពលោករបស់ខ្លួនទល់នឹងជើងខ្លាំងមកពីឥណ្ឌា Arjan Bhullar។ ចំណែកកីឡាការិនីខ្លាញីឥណ្ឌា Ritu Phogat ដែលធ្លាប់ផ្តួលកីឡាការិនីកម្ពុជា នៅ ស្រីពៅ ក៏មានវត្តមានក្នុងព្រឹត្តិការណ៍នេះដែរដោយត្រូវជួបនឹងកីឡាការិនីវៀតណា-អាមេរិក Bi Nguyen៕