កីឡា

ច្បាស់១០០% កីឡាអូឡាំពិកនៅជប៉ុននឹងធ្វើ ទោះបារម្ភកូវីដខ្លាំង

បានផុស

៥ years មុន

នៅ

ថ្ងៃព្រហស្បតិ៍ ៣ មិថុនា ២០២១

ដោយ

ប្រធានគណៈកម្មាធិការរៀបចំការប្រកួតព្រឹត្តិការណ៍កីឡាអូឡាំពិករដូវក្តៅ អ្នកស្រី Seiko Hashimoto បានបញ្ជាក់ថា ១០០%គឺកីឡាអូឡាំពិករៀបចំការប្រកួតនៅជប៉ុន ប៉ុន្តែអ្នកស្រីបានព្រមានថា ដំណើរការប្រកួតត្រូវធ្វើឡើងដោយគ្មានចូលមើល។

នៅសល់តែ៥០ថ្ងៃ ទៀតប៉ុណ្ណោះ ព្រឹត្តិការណ៍កីឡាអូឡាំពិករដូវក្តៅឆ្នាំ២០២០ដែលពន្យាពេលដល់ឆ្នាំ២០២១នេះនឹងចាប់ផ្តើមបើកទំព័រប្រវត្តិសាស្ត្រនៅថ្ងៃទី២៣ ខែកក្កដា ខាងមុខ។

ជប៉ុនកំពុងប្រយុទ្ធប្រឆាំងនឹងករណីកូវីដ-១៩ដែលកំពុងកើនឡើងដែលផ្នែកខ្លះនៃប្រទេសត្រូវបានប្រកាសដាក់ក្នុងគ្រាអាសន្ន។

អ្នកស្រី Hashimoto បាននិយាយថា ៖«ខ្ញុំជឿថា លទ្ធភាពនៃការរៀបចំព្រឹត្តិការណ៍កីឡានេះគឺ១០០% បន្តធ្វើ។ បញ្ហាចោទឥឡូវនេះ ថាតើយើងត្រូវធ្វើយ៉ាងណាឲ្យមានសុវត្ថិភាព និងធានាសន្តិសុខដល់ការប្រកួត»។

«ប្រជាជនជប៉ុនមានអារម្មណ៍អសុវត្ថិភាព ហើយស្របពេលជាមួយគ្នានេះក៏ប្រហែលជាមានអារម្មណ៍អត់សប្បាយចិត្តជាមួយយើងនៅពេលនិយាយអំពីកីឡាអូឡាំពិក ហើយខ្ញុំគិតថា នោះគឺការផ្តល់សំឡេងកាន់តែច្រើនជំទាស់នឹងការរៀបចំ»។ អ្នកស្រីមានប្រសាសន៍។

អ្នកស្រីបន្តថា ៖«បញ្ហាប្រឈមធំបំផុតគឺថាតើយើងអាចគ្រប់គ្រង និងទប់ស្កាត់លំហូចូលមនុស្សរបៀបណា។ បើការផ្ទុះកូវីដ-១៩អាចកើតមានឡើងកំឡុងពេលព្រឹត្តិការណ៍ប្រកួត នោះនឹងក្លាយជាវិបត្តិធំឡើង ឬស្ថានភាពអាសន្នដែលខ្ញុំជឿថា យើងត្រូវតែរៀបចំការប្រកួតដោយគ្មានអ្នកមើល»។

ជាមួយគ្នានេះ អ្នកគាំទ្រអន្តរជាតិមិនត្រូវបានអនុញ្ញាតឲ្យទៅមើលព្រឹត្តិការណ៍កីឡាអូឡាំពិក ឬប៉ារ៉ាឡាំពិករដូវក្តៅនេះឡើយដែលនឹងចាប់ផ្តើមពីថ្ងៃទី២៤ ខែសីហា។

រលកថ្មីនៃការឆ្លងកូវីដ-១៩បានចាប់ផ្តើមឡើងកាលពីខែមេសានៅប្រទេសជប៉ុនដែលតំបន់មួយចំនួនត្រូវបានដាក់បំរាមរឹតបន្តឹងរហូតដល់ថ្ងៃទី២០ ខែមិថុនា។

ជប៉ុនបានចាប់ផ្តើមចាក់វ៉ាក់សាំងដល់ប្រជាជនរបស់កាលពីខែកុម្ភៈដែលច្រើនជាងប្រទេសអភិវឌ្ឍនានា ហើយរហូតដល់ពេលនេះប្រជាជនប្រហែល៣%បានចាញ់ពេញលេញហើយ។

អ្នកស្រី Hashimoto លើកឡើងថា វាជាការសម្រេចចិត្តដ៏ឈឺចាប់ដើម្បីមិនឲ្យមានអ្នកទស្សនាមកពីក្រៅប្រទេស ប៉ុន្តែប្រការចាំបាច់បំផុតគឺធានាសុវត្ថិភាព និងសន្តិសុខដល់ការប្រកួត។

រហូតដល់ពេលនេះ មនុស្សប្រមាណ១ម៉ឺននាក់ក្នុងចំណោម៨ម៉ឺននាក់ដែលស្ម័គ្រចិត្តចូលរួមរៀបចំព្រឹត្តិការណ៍កីឡាអូឡាំពិក២០២០រដូវក្តៅបានលាឈប់ពីការងារ។ នេះបើតាមការឲ្យដឹងពីអ្នករៀបចំ៕

ប្រែសម្រួល៖ វីរបុត្រ
ប្រភព៖ BBC