កីឡា

ព្រះខ័នរាជស្វាយរៀង ត្រៀមខ្លួនរួចជាស្រេចសម្រាប់ការប្រកួតជាមួយ វិសាខា

បានផុស

១០ ខែ មុន

នៅ

ថ្ងៃសុក្រ ២២ មេសា ២០២២

ដោយ

ក្លិបព្រះខ័នរាជស្វាយរៀង នឹងត្រូវជួប ក្លិបវិសាខា ក្នុងជំនួបសប្ដាហ៍ចុងក្រោយ នៃជុំទី ១ លីគកំពូលកម្ពុជា ខណៈក្រុមដែលមានមូលដ្ឋាននៅខេត្តស្វាយរៀង មួយនេះបានត្រៀមខ្លួនរួចរាល់សម្រាប់ការប្រកួត។ នេះបើតាមការបញ្ជាក់ដោយគ្រូបង្វឹក លោក Conor Nestor។

ផ្ដល់កិច្ចសម្ភាសន៍ជាមួយ ‘កម្ពុជាថ្មី’ លោក Conor Nestor បាននិយាយយ៉ាងដូច្នេះថា៖ «កីឡាករបានប្រឹងប្រែងជារងរាល់សប្តាហ៍ ហើយរៀបចំបានយ៉ាងល្អ។ យើងកំពុងទន្ទឹងរង់ចាំការប្រកួតខាងមុខនេះ។»

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិសាខា ក៏ជាក្រុមមួយដែលរបូតគ្រាប់បាល់តិចផងដែរនៅដើមរដូវកាលនេះ ពោលគឺ ៦សប្ដាហ៍កន្លងមកនេះ គេរបូតគ្រាប់បាល់ត្រឹមតែ ៤ គ្រាប់ប៉ុណ្ណោះ ដែលនេះមានន័យថាប្រព័ន្ធការពារ គឺរឹងមាំល្អ ដូចគ្នាទៅនឹង ព្រះខ័នរាជស្វាយរៀង ផងដែរ ដែលរបូតគ្រាប់បាល់ ៤គ្រាប់ដូចគ្នា ខណៈលោក Conor Nestor ក៏បានបន្ថែមពីចំណុចនេះ។

ជុំវិញគូប្រកួតវិសាខា គ្រូបង្វឹកសញ្ជាតិអៀរឡង់ខាងជើងរូបនេះបានបន្តទៀតថា៖ «ការការពាររបស់ពួកគេ គឺល្អខ្លាំងណាស់ ហើយពិបាកក្នុងការបំបែករណាំងរបស់ពួកគេណាស់។ ពួកគេក៏មានកីឡាករមានគុណភាពជាលក្ខណៈបុគ្គលច្រើនដែលអាចបង្កើតឱកាសបានគ្រប់កន្លែងនៅលើទីលាន។»

សូមបញ្ជាក់ថា ជំនួបរវាងក្លិបព្រះខ័នរាជស្វាយរៀង ជាមួយ ក្លិបវិសាខា នឹងធ្វើឡើងនៅថ្ងៃទី ២៣ ខែមេសា ឆ្នាំ ២០២២ នាកីឡដ្ឋានព្រីនស៍ វេលាម៉ោង ៦:៣០ នាទីល្ងាច។ ខណៈងាកទៅរដូវកាលមុន ការជួបគ្នារវាងក្រុមទាំង ២ ទាំងពីរជើង វិសាខា បានយកឈ្នះនៅជើងទី ១ ៣-២ លើព្រះខ័នរាជស្វាយរៀង ស្របពេលដែលនៅជើងទី ២ បានត្រឹមស្មើគ្នា ២-២។

ព្រះខ័នរាជស្វាយរៀង គឺជាក្រុមដែលរកគ្រាប់បាល់បានច្រើនជាងគេក្នុងលីគ ត្រឹមសប្ដាហ៍ទី ៦ ពោលគឺរកបាន ១៨ គ្រាប់ ហើយកំពុងមាន ១៦ ពិន្ទុក្នុងដៃ នាំមុខ ៤ ពិន្ទុលើក្រុមលេខ ២ បឹងកេត ដែលកំពុងកាន់ ១២ ពិន្ទុក្នុងដៃ រីឯក្លិបវិសាខា កមពុងឈរនៅលេខ ៤ មាន ១០ ពិន្ទុ៕

អត្ថបទ៖ មន្នីរ័ត្ន