Connect with us

កីឡា

ពាន​​រង្វាន់​​សម្តេច​​តេជោ​ ហ៊ុន​ សែន​ មាន​​ការ​​វិវត្ត​​គួរ​​ឲ្យ​​ចាប់​​អារម្មណ៍

បានផុស

នៅ

ពាន​រង្វាន់​បាល់ទាត់​សម្តេច​អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា​​ គឺ​ជា​ក្រប​ខណ្ឌ​ប្រកួត​បាល់ទាត់​កម្រិត​អាជីព​ធំ​​លំដាប់​ទី​២​របស់​ប្រទេស​កម្ពុជា បន្ទាប់​ពី​ ​ក្រប​ខណ្ឌ​ខេមបូឌានព្រីមៀរលីគ​។

ពាន​រង្វាន់​សម្តេច​តេជោ Hun Sen Cup ត្រូវ​បាន​បង្កើត​ឡើង​ជា​ផ្លូវ​ការ​លើក​ដំបូង​ក្នុង​ឆ្នាំ​២០០៧​ ដែល​រហូត​ដល់​ឆ្នាំ​២០២២​នេះ​មាន​​ចំនួន​១៦​រដូវ​កាល​ហើយ។ ក្នុង​រយៈពេល​ជា​ច្រើន​ឆ្នាំ​នេះ​ រូបមន្ត​នៃ​ការ​ប្រកួត​មាន​ការ​ប្រែ​ប្រួល និង​វិវត្ត​គួរ​ឲ្យ​កត់​សំគាល់​​ដើម្បី​ឈាន​ទៅ​រក​កម្រិត​​ស្តង់ដា​ និង​ជំរុញ​ការ​អភិវឌ្ឍ​បាល់ទាត់​កាន់​តែ​ប្រសើរ​ឡើង។

ក្រុម​ភ្នំពេញ​ហ្គាឡាក់ស៊ី ឈ្នះ​ជើងឯក​ថ្នាក់​ខេត្ត​ឆ្នាំ​២០២២
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
  • ឆ្នាំ​២០០៧-២០១១

ពាន​រង្វាន់​សម្តេច​តេជោ ហ៊ុន សែន ​គិត​ចាប់​តាំង​ពី​ឆ្នាំ​២០០៧​រហូត​ដល់​ឆ្នាំ​២០១១ ការ​ប្រកួត​​ដំបូង​បែង​ចែក​ជា​ពីរ​ដំណាក់​កាល​គឺ​​ដំណាក់​​កាល​ចែក​ចេញ​ជា​ពូល​ និង​វគ្គ​ចាញ់​ធ្លាក់ ឈ្នះ​ឡើង។ ការ​ប្រកួត​វគ្គសន្សំ​ពិន្ទុ​ក្នុង​ពូល​នេះ​មាន​២៨​ក្រុម​ចូល​រួម​ប្រកួត។ ដំណាក់​កាល​ទី​២ ក្រុម​ចំនួន​១៦​ត្រូវ​បាន​ជ្រើស​​រើស​ចេញ​ពី​ការ​ប្រកួត​សន្សំ​ពិន្ទុ​ក្នុង​ពូល​ដើម្បី​ឡើង​ទៅ​ប្រកួត​វគ្គ​ចាញ់​ធ្លាក់ ឈ្នះ​ឡើង​​គិត​ចាប់​ពី​វគ្គ​១៦​ក្រុម​ចុង​ក្រោយ វគ្គ​៨​ក្រុម​ចុង​ក្រោយ វគ្គ​​ពាក់​កណ្តាល​ផ្តាច់​ព្រ័ត្រ និង​វគ្គ​ផ្តាច់​ព្រ័ត្រ។

  • ឆ្នាំ​២០១២-២០១៧

យ៉ាង​ណា នៅ​រដូវ​កាល​ទី​៦ ឆ្នាំ​២០១២ រូបមន្ត​ប្រកួត​ត្រូវ​បាន​​ផ្លាស់​ប្តូរ។ រដូវ​កាល​នេះ ក្រុម​​ខេត្ត​ទាំង​អស់​ត្រូវ​បាន​ប្រកួត​ជម្រុះ​​​ក្នុង​ពូល​តាម​មណ្ឌល/ភូមិ​ភាគ​នី​មួយ​ៗ​​ដើម្បី​ជ្រើស​​រើស​យក​​មក​ប្រកួត​វគ្គ​ចែក​ពូល ជា​មួយ​នឹង​ក្លឹប​​អាជីព​ទាំង​៨ ឬ​១០​ក្រុម​​នៅ​ក្នុង​ក្រប​ខណ្ឌ​ខេមបូឌានព្រីមៀរលីគ​ និង​មាន​ការ​ប្រកួត​បន្ត​បន្ទាប់​ក្នុង​វគ្គ​ចាញ់​ធ្លាក់​ ឈ្នះ​ឡើង​រហូត​ដល់​វគ្គ​ផ្តាច់​ព្រ័ត្រ។

  • ឆ្នាំ​​២០១៨​-២០២១

អ្វី​ដែល​គួរ​ឲ្យ​កត់​សំគាល់ នៅ​ឆ្នាំ​២០១៨ ការ​ប្រកួត​ត្រូវ​បាន​ធ្វើ​ឡើង​ជា​​​ពីរ​កម្រិត​ផ្សេង​​គ្នា​ពោល​គឺ​ការ​ប្រកួត​ថ្នាក់​ខេត្ត និង​ការ​ប្រកួត​ថ្នាក់​ជាតិ។ ការ​ប្រកួត​ថ្នាក់​ខេត្ត​ត្រូវ​បាន​បែង​ចែក​ជា​ពូល និង​មណ្ឌល​ទូទាំង​ប្រទេស។ ជា​ពិសេស​ទៀត​នោះ មាន​ការ​ប្រកួត​ក្នុង​ដី និង​ក្រៅ​ដី។

ការ​ប្រកួត​ថ្នាក់​ខេត្ត​នេះ​មាន​ការ​ប្រកួត​ដណ្តើម​យក​ចំណាត់​ថ្នាក់​លេខ​៣ និង​ជើង​ឯក​ត្រឹម​ត្រូវ​ដែល​មាន​ប្រាក់​រង្វាន់ ព្រម​ទាំង​ពាន​រង្វាន់​​ឯកត្តជន​ទៀត​ផង។ បន្ទាប់​ពី​ចប់​ការ​ប្រកួត​ថ្នាក់​ខេត្ត​គឺ​មាន​តែ​៤​ក្រុម​ប៉ុណ្ណោះ​ដែល​មាន​សិទ្ធិ​ឡើង​ទៅ​ប្រកួត​ថ្នាក់​ជាតិ​ដែល​យក​ពី​ក្រុម​លេខ​​១​ដល់​ក្រុម​លេខ​៤។

ការ​ប្រកួត​ថ្នាក់​ជាតិ​ត្រូវ​បាន​បែង​ចែង​ជា​ពូល​ដែល​ត្រូវ​បាន​ចាប់​ឆ្នោត​រវាង​ក្រុម​មក​ពី​ថ្នាក់​ខេត្ត​ទាំង​៤ និង​ក្លឹប​អាជីព​ស្ថិត​នៅ​ក្រុប​ខណ្ឌ​ខេមបូឌានព្រីមៀរលីគ​​ដែល​ត្រូវ​ប្រកួត​វគ្គ​សន្សំ​ពិន្ទុ​ក្នុង​ពូល​ ​វគ្គ​ខ្វែង រហូត​វគ្គ​ផ្តាច់​ព្រ័ត្រ។

  • ឆ្នាំ​២០២២

រឹត​តែ​ពិសេស​នោះ ក្រុមទាំង៤ មក​ពី​ថ្នាក់ខេត្តដែល​កាល​ពី​មុន​ចូល​វគ្គ​ចែក​ពូល​ថ្នាក់​ជាតិ​ជាមួយក្លឹប​​លីគកំពូលកម្ពុជាតែម្ដងនោះ​មាន​ការ​​ប្រែ​ប្រួល​ហើយ បន្ទាប់​ពី​មាន​លីគ​ទី​២។ ក្រុម​ថ្នាក់​ខេត្ត​ទាំង​៤​នោះ​ត្រូវ​ប្រកួត​ជម្រុះ​ជា​មួយ​ក្រុម​​​នៅ​ក្នុង​ក្រប​ខណ្ឌ​លី​គ​ទី​​២​ដែល​​មាន​១២​ក្រុម ដូច្នេះ​បូក​ជាមួយ​​ក្រុម​​​ថ្នាក់​ខេត្ត​៤គឺ​សរុប១៦​ក្រុម។

ក្រុម​ព្រះ​ខ័នរាជ​ស្វាយ​រៀង​ជា​ជើង​ឯក

ការ​ប្រកួត​ជម្រុះ​រវាង​ក្រុម​​ថ្នាក់​ខេត្ត និង​ក្រុម​លីគ​ទី​២​នេះ នឹង​ត្រូវ​ជ្រើស​រើស​យក​ចំនួន​​៦​ក្រុម បូក​រួម​ជា​មួយ​ក្រុម​អគ្គស្នងការ​នគរ​បាល់​ជាតិ និង​អគ្គីសនី​កម្ពុជា​ដែល​ត្រូវ​បាន​កំណត់​​​ឲ្យ​ស្ថិត​នៅ​​​វគ្គ​ថ្នាក់​ជាតិ។ ដូច្នេះ​មាន​​៨​ក្រុម​ឡើង​ទៅ​វគ្គ​ថ្នាក់​ជាតិ​ដែល​មាន​ក្លឹប​អាជីព​៨​នៅ​​លីគ​កំពូល​កម្ពុជា។ សរុប​ទៅ​ការ​ប្រកួត​ថ្នាក់​ជាតិ​មាន​​១៦​ក្រុម។

ការ​ប្រកួត​ថ្នាក់​ជាតិ​​ដែល​មាន​​១៦​ក្រុម​​នឹងធ្វើ​ឡើង​​​២​​ជើង​​ចាប់​ពី​​​ថ្ងៃទី​​២១ ខែមិថុនា ​រហូត​ដល់​ថ្ងៃ​ទី​​២៦ ខែ​តុលា ឆ្នាំ​២០២២​ទើប​ចប់។

សូម​បញ្ជាក់​ថា ក្លឹប​ព្រះ​ខ័ន​រាជ​ស្វាយរៀង បាន​ឈ្នះ​ពាន​រង្វាន់​សម្តេច​តេជោ ហ៊ុន សែន បាន​ច្រើន​ជាង​គេ​ពោល​គឺ​​៤​ដង ខណៈ​ក្លឹប​វិសាខា​ជា​ក្រុម​ការពារ​តំណែង​ជើង​ឯក​ឆ្នាំ​២០២១៕

អត្ថបទ៖ វីរបុត្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម